صعيدى علمنى الادب ٣٤ حنين عادل

…………………………

كريمه بتفوق…

كرم: حمد الله علي سلامتك

كريمه: الله يسلمك

صفاء: الحمد لله يا خيتي دي اخر عمليه

كريمه: الحمد لله نجحت

صفاء: الدكتور بيقول خلاص نطمن علي الجرح وبعدين نمشي من هنا

كريمه: ياريت عشان انا زهقت من المستشفيات

بتبص لكرم اللي كان مبتسم وكأنه فرحان لها بإستغراب

كريمه بتفكير: اكيد مبسوط انه هايخلص منيكي يا حزينه

……………………..

بدر: الحمد لله يا خوي كلها جروح سطحيه وهاتخف

شاكر: الحمد لله ..الواحد لما بيقع بيقول أخ وانا لما كنت في زنقه كنت خابر انك انت اللي هتطلعني منيها ربنا يخليك ليا..

بدر: انت مش اخويا بس دا انت ابويا وحبيبي وسندي ..

شاكر: ربنا ما يحرمني منك .

بدر: لولا انك شغلت دماغك ووقعت التليفون كانت استفردت بيك بس ربنا سترها

شاكر: الحمد لله..روح فاقت

بدر: لسه يا خوي انا رايح اشوفها مش هاعوق عليك

بيطلع بدر من عند شاكر..

شاكر بتفكير: ياتري اكده خلصنا من شرك ومن اذاكي يا ساميه ولا لاه وهاتعاودي بجنانك الواعر ده تئذينا انت لازم تموتي ..

……………………………..

مصطفي: انت بتقول ايه كل ده حصل

خالد: ايوه ..انا هاكذب عليك ليه

مصطفي: يعني ام يونس المفتريه القادرة كانت هاتموت ابنها اللي هوا يونس راحت روح عملت فيها جامدة وحاولت توقفها وشدت المسدس منها راحت ضرباها بالفاظه راح يونس قايل انه اللي ضربها ودخل السجن راح ابويا اتعصب ورايحلها راحت ضاحكه عليه وعلمت عليه وبعدين عذبته …

خالد: بالظبط كده اخيرا فهمت..

مصطفي: طيب انا رايح اطمن علي ابويا احنا عايشين في مسلسل احداثه غريبه اوي الحمد لله اني بعدت اليومين دول اصل كنت اتاخدت في الرجلين

خالد: شكلك شهم اوي يا مصطفي

مصطفي: جدا …وجدع ..

……………………………..

في اوضه روح …

بدر : ها يا صغير مش هاتصحي بقا انا تعبت من غيرك حاسس اني مش عايش وحشني صوتك وكلمه لا اله الا الله اللي علطول بتقوليها وحشني غرورك وكل شويه انا جميله جمال مالوش مثال وجمالي الفتاك وكنت بفرح اوي لما اقولك جمالك ولا جمال عبد الناصر عارفه رجعتيني تاني عيل صغير وحشني صوتك وانتي بتحاولي تتكلمي صعيدي بيبقي زي الأجنبي لما يجي يتكلم عربي وحشني روح اوي مش ناويه تحني علينا بقا …