عشق الزين ٢٧ ج٢ ملك ابراهيم
ليليان: طيب انتي ايه اللي غصبك على كدا … مكنتيش تقعدي معاه كنتي اقعدي مع مهاب .
سارة: اتهمني ان زي ما زمان عاقبت كاميليا وحرمتها من ابوها … هاحرمها من وجودي معاها في اكتر وقت هي محتاجني فيه .
ليليان: بس انتي مش هتستحملي ضغط الاعصاب دا .
سارة: اهو خلاص كاميليا هاتتجوز بكرة وانا هاسافر.
ليليان: وتسيبني … دا انا ما صدقت انك رجعتيلي .
سارة: غصب والله بس مش هاقدر اقعد في مكان كله رافضني فيه .
كاميليا جت عليهم: ماما تعالي ارقصي معايا يا حبيبتي .
( سارة مسحت دموعها بسرعة وقامت معاها … بتحاول تظهر الفرحة وهي جواها نار بتقيد ).
في احد النوادي .
ياسمين: ريهام!
ريهام بتبص في تليفونها: ايه ؟.
ياسمين: مش دا زين الجارحي .. بيشاور عاوزك .
(ريهام رفعت وشها مرة واحدة لقت زين في وشها بيشاورلها …قامت راحتتله )..
ريهام: ازيك يا انكل .
زين: كويس .
ريهام: حضرتك عاوزني .
زين: اه عاوزك … انا جايلك علشان حاجة واحدة بس… لو خايفة على مستقبلك ونفسك ومستقبل ابوكي وعيلتك كلها ابعدي عن عيلتي احسنلك .
ريهام بارتباك: ااا…عملت ايه ياعمو .
زين بحدة: هاقولك … مثلا الواد التافه اللي مكلفاه يراقب ميرا مرات مراد علشان يخطفها .. رجالتي مسكوه واعترف عليكي .. انا كنت عارف ان واحدة زيك مش هتسكت .. بس والله لو فكرتي بس تمسي حد من ولادي لاقت*لك وانا مش بحلف كدا … كله الا ولادي .. لو مش عارفة مين زين الجارحي … اسالي عني .. او اسالي والدك عني .
ريهام: الواد دا كداب انا معملتش حاجة وانا هاخطف ميرا دي ليه ؟.
زين بمكر: علشان خطفت قلب مراد اللي انتي كنتي بتحاولي تجذبي نظره ليكي .. اوعي تكوني فاكرة اني مش عارفك وفاهمك تؤتؤ يبقى متعرفنيش .. انا بس كنت سايب آسر يعرفك بنفسه ويكشف وشك الحقيقي .
ريهام: ااا…
زين: نهاية الكلام … ابعدي عننا علشان انا زعلي وحش وبلاش تجربيه .
(زين مشي وساب ريهام جت ياسمين عليها ).
ياسمين: كان عاوز ايه ؟.
ريهام بضيق: مفيش … ماتيجي نسهر في اي مكان … انا اتخنقت .
تاني يوم
في احد المساجد .
( تم عقد قران ادهم وعمر وآسر … واجواء الفرح كانت باينة على وشوش الموجودين ).
مراد الالفي: خلي بالك منها يا ادهم .
ادهم بفرحة: في عنيا متقلقش … يالا يا كاميليا .
كاميليا حضنت ابوها: هاتوحشني اوي يابابا… اتعودت على وجودك في حياتي .
مراد: حبيبتي هاتروحي مني فين .. هاترجعو على البيت .. وهتفضلي جنبى على طول .
سارة بدموع: هاتوحشيني يا كاميليا اول مرة تبعدي عن حضني .
كاميليا بعدت عن مراد وحضنت سارة: ماما ..اوعي تسافري الا لما ارجع من السفر .
سارة بصوت مبحوح: حاضر .
