عشق الزين ١٨ج٢ زيزى محمد
هنا: ومقولتيش ليه انه كان عايش انا فاهمة ان دا كله انه مات …ولما عرفت من ماما وماما نبهت عليا خوفت اقولك تقولي لعمتو سارة تقوم تقول لبابا ويخليني اقطع علاقتي باليان …وخوفت اقولك اصدمك من فكرة انه عايش .
كاميليا: مكنتش بتكلم …كنت هاتقولي حرام ابوكى ..طيب وماما اعمل ايه …ماما حطتنا في دوامة… دوامة كبيرة ملهاش نهاية ..هانفضل نلف ومحدش هايرتاح .
هنا: بس انتي غلطتي …كان واضح اوي اهتمام ادهم بيكي …من غير ما حتى يعترف ..غلطتي على فكرة .
كاميليا: لازم يحصل كدا ..انا هاقوم انام تعبت جدا انهاردة .
هنا: اوك .
( كاميليا سابت هنا لوحدها ..وهنا اتنهدت بحزن ).
هنا: الدنيا دي مش مريحة حد ابدا …ولا اللي بيحب مرتاح ولا اللي مبيحبش مرتاح …طب والله انا بقول حكم …انام احسن .
صباحا في مطعم
( مراد وسارة قاعدين كل واحد في ترابيزة مختلفة وسارة متجاهلة نظرات مراد …هيا خلاص تعبت ولا قادرة تفكر ولا تعرف ولا تفهم .. وصلت لقرار تكمل اجازتها وتسافر لندن تاني ).
فريد: سارة صباح الخير .
سارة: صباح الخير يا فريد…ازيك يا زيزو .
زياد: الحمد لله .
فريد: زياد لما عرف انك هنا أصر يشوفك .
سارة اخدته في حضنها: وحشتيني اوى يا زيزو …مالك زعلان ليه كدا ؟.
فريد: مالوش .
فريد ضغط على جسم زياد بايده وزياد افتكر تنبيهاته: طنط سارة … ممكن تيجي معايا تشتري هدوم ليا .
سارة زياد صعب عليها: ماشي يا حبيبي .
زياد: طيب يالا بينا .
( سارة مشيت مع فريد وزياد تحت انظار مراد …مراد اتصل على مراد الجارحي ).
مراد الالفي: بقولك عاوزك .
مراد الجارحي: انت فين ؟.
مراد الالفي: في المطعم .
مراد الجارحي: ثواني واكون عندك .
ريهام: سرحانة في ايه يا ميرا .
ميرا: مفيش …خير.
ريهام: كل خير …عادي قولت اقعد معاكي اسلي نفسي شوية .
ميرا: دا على أساس ان انا تسالي ولا ايه ؟.
ريهام: هو انتي ومراد متجوزين بجد .
ميرا بسخرية: لا كدب …
تابعت كلامها: انتي مالك بيا انا ومراد بتدخلي في حياتنا ليه ؟.
ريهام: ماليش …هاقوم انزل البحر شوية …باي .
( ريهام مشيت وميرا اضايقت جدا وقررت تتكلم مع مراد وتحط حد للموضوع دا ويحترمها منعا للكلام ).
مراد الجارحي: خلي في بالك انت بتستغلني .
