عشق الزين ٢١ج٢ زيزى محمد
مراد: مش عارف بشوف كدا في الافلام البطل يأكل البطلة والبطلة تبقى مبسوطة …وبما ان حضرتك قولتيلي ان ماليش في الرومانسية فانا هاقلدهم .
ميرا: بس انا عاوزاها طالعة من جواك مش تقليد .
(مراد بدء يقطع في الأكل ويأكلها ..وهيا كانت مبسوطة باهتمامه … اتكسفت من نظرات الناس …بس فضلت مستمتعة بيه وبحنيته عليها ).
مراد: شبعتي .
ميرا: اه جدا .
مراد: طيب يالا نتمشى شوية لغاية معاد السينما .
( مراد اخدها وطلعوا واتمشوا وفضلوا يحكوا ويتكلموا وكل واحد بدء يكتشف في تاني حاجة جديدة .. مراد فاجأة شاف ورد مزروع وكان لونه اصفر جميل .. راح قطف واحدة ).
مراد: اقبلي الوردة دي مني .
ميرا: عارف الوردة دي عندي احسن من مليون بوكيه او هدية …عارف ليه علشان هيا طالعة من جواك .
مراد: كل حاجة بعملها معاكي طالعة من جوايا …عشان مكذبش عليكي انا عرفت بنات كتير بس ولا واحدة حبتها ولا واحدة شدتني زي مانتي شدتيني ولا واحدة خلتني عاوز انول راضاها ..انتي حاجة مختلفة كدا .
ميرا: وانا عمري ما كنت اتخيل ان احب حد من اول لحظة واول نظرة …زي ما حبيتك .
مراد: بتحبيني زي مانا بحبك .
ميرا بكسوف: انا بحبك قبل ما انت تحبني .
مراد: طيب وانتي جاية تعترفي بحبك دا في الشارع … ارزعك بوسة في الشارع علشان تتبسطي .
ميرا بضحك: مش بقولك انت غريب … بقولك انا عاوزة اطلب طلب .
مراد: اطلبي اللي نفسك فيه ..انتي انهاردة اعملي اللي انتي عاوزاه .
ميرا: عاوزة آكل ايس كريم من المحل دا .
مراد: عاوزة تاكلي ايس كريم طب ودا ينفع وانا افتكرت هاتطلبي مني حاجة رومانسية ..انتي ليه يا حبيبتي دماغك في الأكل .
ميرا: ماهو الايس كريم رومانسية بردوا نأكل ونوقع على هدومنا وكدا .
مراد: دي رومانسية ! …دي رومانسية معوقة ..متفكريش تاني …خليكي هنا لغاية ما اجبلك واجاي .
ميرا بضحك: وانا هاقطع الوردة واقعد اقول بيحبني ولا لأ .
مراد: لأ انا بحبك مش مستاهلة تبوظي الوردة.
( مراد سابها وهيا قعدت تحت شجرة وبصت للوردة وابتسمت ..بس فيه صوت خلها ترميها من ايديها من الخوف )
يوسف: حلوة الوردة صح .
ميرا رفعت راسها بسرعة واتصدمت من وجود يوسف: ع..عمو…يو .
يوسف:صدمة صح .. اوعي تكوني فاكرة اني سايبك معاه او مع زين الجارحي ضعف بالعكس …انا سايبك تحبيهم ويحبوكي علشان لما اخدك واخفيكي من على الارض يزعلوا وينكسروا وراكي وخصوصا ليليان .
