مش حب عادى ٢٧ ملك ابراهيم

اتكلم عبد الرازق بصوت اضعف: وصيتك أنس ورباب .. ومرات عمك.. خلي بالك منهم.. دي وصيتي ليك يا رحيم..

وفجأة بص للسما وكأن في صوت بينادي عليه..
وتوقفت انفاسه مع توقف دقات قلبه.

رحيم قفل عيون عمه وهو حاسس بالقهرة جواه.. وجع عمره ما تخيل انه هيحس بيه.

الجد مرسي كان بيبص على ابنه وعقله مش قادر يستوعب ان ابنه عبد الرازق مات قدام عنيه..
جري واحد من الفلاحين يسند الجد مرسي بعد ما وقع على الأرض بعد صدمة مو*ت ابنه.
رواية مش حب عادي بقلمي ملك إبراهيم.
في قصر الجبالي.
دخل واحد من الخفر بيجري على جوه وهو بيقول ببكاء: يا أنس بيه.. يا أنس بيه.

أنس كان قاعد بيفطر وامه واخته قاعدين معاه بيتكلموا.

أنس رد على الخفير وهو بيقرب منه: في ايه؟؟

الخفير مسح دموعه في كم جلابيته وقال: الحاج عبد الرازق…

أنس بص له بدهشة: ماله؟

الخفير ببكاء: الحاج عبد الرازق اتقـ،ـتل.

صرخت امال ام أنس بكل صوتها.. ورباب وقفت تصوت جنب امها.

جسم أنس اتجمد مكانه وحس انه في كابوس والكلام اللي الخفير قاله مش حقيقي!

زعق في الخفير بغضب وقاله: ايه الكلام الفاضي اللي بتقوله ده يازفت انت.. دا أبويا لما يرجع هيخلي ليلتك سوده على الكلام اللي قولته عليه ده!

الخفير كان بيبكي قدام أنس وهز راسه بـ معنى ان ابوه مش هيرجع تاني.

عقل أنس رافض يصدق انه مش هيشوف ابوه تاني!
في اللحظة دي حس ان ضهره اتكسر..
وكأنه فجأة كبر وبقى عمره 100 سنه..

شاف اكتر من واحد من الخفر داخلين والحزن مالي وشهم..

بدأ يحس ان الكلام حقيقي..
خرج من القصر بسرعه يجري عشان يشوف ابوه.. مع كل خطوة كان بيدعي جواه ان دا ميكنش حقيقي.. ويسمع صوت ابوه وهو بينادي عليه أو بيزعق له زي العادة.. مش مهم هيعمل فيه ايه المهم يسمع صوته تاني.
رواية مش حب عادي بقلمي ملك إبراهيم.
بعد خمس ساعات.
خرجت حبيبة من الجامعة وهي بتبص في تليفونها بضيق لأنه فصل شحن منها ومخدتش بالها انه مقفول غير وهي خارجة دلوقتي..

خايفه يكون رحيم اتصل عليها ولقى تليفونها مقفول وأكيد هيقلق.

لقت السواق واقف مستنيها قدام العربية وكان بيخفض وشه في الأرض وشكله حزين.

قربت منه ولقته بيقولها: البقاء لله يا دكتورة.

حبيبة بصت له بصدمة واتجمدت مكانها.. حست ان قلبها وقف ومش قادرة تنطق.. خوفها كله كان على رحيم.. نطقت بصوت متقطع من الرعب: البقاء لله في مين؟