صعيدي علمنى الحب ٢٨ حنين عادل

بيصحي النمر من نومه مش بيلاقيها جمبه

بيطلع بره الكوخ مش بيلاقيها بيفضل يبص يمين وشمال مش بيشوفها…

بيرفع شعره بإيده لفوق بقلق وبيضرب برجله في الرمله ..

بيفتح تليفونه وبيحاول يرن عليها مقفول ..

بيقلق وبيبتدي يدخل عقله افكار وحشه ان ساميه عملت فيها حاجه ..

بيطلع رقم علي تليفونه …

يونس: ايوه يا أحمد اعمل اللي هاقولك عليه
______________________
في بيت بسمه

بتنزل بسمه من علي السلم بتلاقي فوزيه واقفه وحاطه ايدها في وسطها

فوزيه: رايحه فين يا هانم

بسمه: رايحه الجامعه ياما

فوزيه: انتي ماعندكيش دم مافيش ميه في وشك رايحه وجدك وجوزك الله اعلم بمصيرهم

بسمه: مش جوزي لسه …اما جدي فايعدي الوضع زي ما عدي قبله كتير مش هايغلب سيبيني بقا عندي محاضره مهمه

بتمشي بسمه …

بتمسكها من ايدها وبتزقها بتقع علي الارض

بسمه بتتخبط في دراعها بتمسكه والدموع ماليه عينيها ..

فوزيه: عيله جليله الربايه….اما اكلمك تقفي قدامي انتباه لما اخلص كلامي بلاها دموع التماسيح دي وجعك قوي

بسمه: لاه ما وجعنيش قد ماقلبي وجعني من كتر الجفا اللي بشوفه منك

فوزيه: مافيش خروج من البيت سامعه …

بتمشي فوزيه وهيا سيباها واقعه علي الارض ..

بتقوم بسمه وهيا ماسكه دراعها ودموعها بتنزل.

بسمه : هيا دي الأم …هيا كل الأمهات كده ولا انا الغلط مني يمكن مزعلاها في حاجه !
_________________________
في بيت ميرا

ميرا : ازاي وامتي

اسلام: امبارح ..

ميرا: لا اله الا الله ربنا يشفيه

خالد باستغراب: بتدعيله

ميرا: ايوه بدعيله الا المرض يا خالد مافيهوش شماته ماحدش ضامن نفسه

اسلام: انا هتابع كده وهاقولك

ميرا: طيب هاتفضل واقف علي الباب ماتدخل

اسلام: لا مش فاضي دلوقتي سلام انا بقا

ميرا: بالسلامه

بتقفل ميرا الباب وبتقعد مع خالد ..

خالد: واحده غيرك كان فاتها مبسوطه دلوقتي

ميرا: اديك قولت واحده غيري مش أنا

خالد: عاوزه تزوريه

ميرا: لأ

خالد: ليه

ميرا: لأني مش مسامحاه يا خالد علي اللي عمله انا اه صحيح ممكن طيبه بس مش بنسي مش بنسي اي حاجه سواء حلوه او وحشه ماعنديش قدرة العفو عارفه ان ربنا اللي فوق الكل بيسامح انسان ضعيف زيي مايسامحش ليه بس العفو مقدرة وانا مش بقدر اسامح ربنا يشفيه بس انا استحاله اسامحه علي اللي عمله لانه اكيد كان ليه ايد في تعب اخويا ..