العنيد ١٥ الشيماء محمد
ادهم وميرا وقفوا يراقبوا في صمت
اخيرا النهار خلص وادهم فاكر انه هيروح بس عم حسن مسك فيهم جامد ومصطفي هيبات وليلي قالت هتبات مع اخوها وقالت لادهم لو حب يروح هو بس طبعا هو محبش يروح ويسيبها لوحدها
طول الليل ليلي وحمدي سهرانين مع بعض وادهم قعد معاهم بس فضلوا يحكوا عن ذكرياتهم ويضحكوا ومصطفي وامل برضه وكلهم مع بعض بس ادهم وميرا ساكتين بيسمعوا في صمت
اخيرا روحوا بس الارتياح ما دامش
لان يومين بالظبط وحمدي جه هو وامل بيت ادهم اللي اتفاجئ بيهم تماما واللي فاجؤه اكتر ان معاهم شنط وكأنهم ناويين يقعدوا مش زياره وماشيين
ادهم اخد ليلي وطلع اوضتهم
ادهم: ايه بقي ده ان شاءالله؟
ليلي: ايه ايه؟ قصدك علي ايه؟
ادهم: ايه الشنط اللي معاهم دي؟؟؟
ليلي: هيقعدوا كام يوم… حمدي بيدور علي شقه يستقر فيها لانه اتعين في الجامعه هنا؟ وبعدين برضه اشتغل في المستشفي العسكري وامل هتاخد كام كورس فجت معاه علشان ابوها كان رافض تيجي لوحدها وما وافقش غير لما جت مع عمها حمدي وعرف انها هتقعد عندي
ادهم: نعم يا اختي يقعد هنا؟؟؟ مين ده اللي يقعد هنا ومين قالك اني هوافق اصلا!؟؟
ليلي: وانت من امتي بتقفل بابك في وش حد ومن امتي بتتخلي عن حد بيحتاج مساعدتك؟؟؟
ادهم: ده راجل مش عيل محتاج مساعدتي ولا واحده ضعيفه مش هتعرف تتصرف…. امل تقعد معاكي علي عيني وعلي راسي لكن حمدي بتاعك ده لأ
ليلي: خلاص انت حر انزل قوله امشي من بيتي
ادهم: انتي تتصرفي
ليلي: لا طبعا انا مش هتصرف انا مش هقول لابن عمي امشي من بيتي… انت بقي عايز تقل بأصلك مع عم حسن روح واطرد ابنه وقوله عشم ابوك مش في محله اتفضل
ادهم: انتي بتلوي دراعي سيادتك؟؟
ليلي: انا ماليش دعوه هما اتصلوا وقالو جايين مقدرش اقولهم لأ
ادهم: وانا مش عاجبني الوضع ده اخبط دماغي في الحيط بقي ولا اعمل ايه؟
ليلي: دي مش مشكلتي دي مشكلتك انت….. وبعدين لما انت فتحت بيتك لميرا وقعدتها هنا وانت لوحدك وماعجبنيش الوضع انا ومصطفي قولتلنا اخبطوا دماغكو في الحيط
ادهم: وسيادتك بترديهالي دلوقتي؟؟؟؟
ليلي: لا انا ما بفكرش كده بس ده وضع اتحطينا فيه يا تتقبله علشان خاطر عمي حسن يا ترفضه انت حر بيتك وانت حر فيه؟
ادهم يدوب هيرد تليفونه رن وكان عم حسن اللي كان بيشكره جامد جدا علي ضيافته لابنه وحفيدته ومش عارف ازاي يرد جمايله دي
