العنيد ١٥ الشيماء محمد
ادهم قفل السكه في وشها وهيتجنن من اصرارها ده
عند ليلي
ليلي: اهو رفض وقفل في وشي عاجبك كده؟
مصطفي: نلجأ للخطه اتنين
ليلي: ايه هيا الخطه اتنين؟؟
مصطفي: اقولك اتصلي بعمك حسن وقوليله ان مصطفي جاي وادهم رافض يجي وبيقول ما ينفعش نطب كده ومهما اقنعه هو مكسوف وعمك حسن هو اللي هيتصرف معاه يالا
ليلي: انت متأكد؟؟ انا حاسه ان احنا مزودينها؟؟
مصطفي: مزودين ايه؟ هو احنا لسه عملنا حاجه؟ ده لسه التقيل جاي؟
ليلي فعلا اتصلت بعمها وعمها تكفل بالباقي وكلم ادهم اللي رجع البيت بسرعه ولقي مصطفي مع اخته
ادهم: انتي كلمتي عم حسن تشتكيله مني؟؟؟
ليلي: ما اشتكيتلوش بس مصطفي رايح وهو كلمه فسلمت عليه فعزمني اروح وطبعا انت كنت رافض فمعرفتش اقوله ايه؟
ادهم: تقومي تدبسيني انا؟؟؟ ماشي براحتك اتفضلي اجهزي يالا وانت مش هتجيب خطيبتك ولا ايه؟
مصطفي: لا هجيبها يالا اسبقكم انا ونتقابل علي الطريق
ادهم اخد ليلي وابنه طلب يروح عند اياد فكلم ايمن وهو رحب بيه جدا فوداه لايمن وسافروا ومصطفي جاب خطيبته وفعلا وصلوا البلد مع بعض
طبعا حمدي اول ما عرف بوصولهم طلع يجري يستقبلهم وكالعاده استقباله لليلي ضايق ادهم
دخلوا والكل اتجمع بيرحب وشويه ودخلت امل سلمت علي الكل
مصطفي: احلويتي وكبرتي كده امتي؟؟؟
امل: امال هفضل صغيره علي طول ولا ايه؟ انت بس اللي استعجلت وتقول صغيره قال
مصطفي ضحك: انتي لسه فاكره خلي قلبك ابيض…
امل: ماشي علشان بس خطيبتك قمر هسكت انما لو كانت وحشه كنت ق..تل..تك
مصطفي هزر كتير مع امل وخصوصا انه لقي ميرا اتضايقت
ليلي خرجت هيا وحمدي ومصطفي وراها وسحب امل معاه
واتجمعوا الاربعه مع بعض
حمدي: لولا هو انا ليه حاسس ان جوزك مش طايقني
ليلي: لان هو فعلا مش طايقك
مصطفي حكالهم علي خطته كامله
امل: يعني انت عايز حمدي يجنن ادهم وانا اجنن ميرا صح كده اللي فهمته؟؟
مصطفي: بالظبط؟
امل: طيب ليه بس كل ده؟ الغيره مش حلوه وبعدين هيكرهونا
مصطفي: هما ما بيقتنعوش بحاجه اسمها غيره فلازم يجربوها علشان يبقي يعذروا شويه….
وبدأت الحرب البارده
الرغي والضحك والهزار واللعب وادهم وميرا اول مره يدوقوا طعم الغيره بجد
ليلي هيا وحمدي بيتمشوا في الجنينه ومصطفي بيهزر هو وامل
ادهم وميرا واقفين مع بعض في التراس بيتفرجوا عليهم والنار بتشعلل
ميرا: شايف مصطفي ولا معبرني
ادهم مردش عليها لانه مركز مع ليلي وبيحاول يقري حركات شفايفهم بس مش عارف لانهم بيتهامسوا ولان مصطفي منبهم للنقطه دي بالذات
ميرا: ادههههم انت مش سامعني؟؟
ادهم: سوري مخدتش بالي ايه في ايه؟
ميرا: بقولك وبعدين اعمل ايه لمصطفي؟؟
ادهم: ماله مصطفي؟؟
ميرا: هو انت مش شايفو مش معبرني خالص ومهتم باللي اسمها امل دي؟؟
ادهم: طيب ما تروحيله سايباهولها ليه!؟؟
ميرا: وانت ما تروح لمراتك سايبها لحمدي ليه؟؟
ادهم: انا وضعي مختلف
ميرا: مختلف في ايه بقي؟
ادهم: انا وهيا مش متصافيين مع بعض وكل واحد واخد جنب لكن انتو مع بعض مفيش مشاكل بينكم فمنطقي انك توقفي معاه لكن انا مابكلمش ليلي وكل واحد في حاله فهتبقي غريبه لو روحتلها دلوقتي
