العنيد ١٥ الشيماء محمد

ادهم: بجد…. امممم
سابهم وقام وحس ان معدلوش مكان في بيته او معدلوش لازمه في حياه مراته او ابنه
يوسف برضه بعد عن ادهم واتعلق بحمدي جامد اللي ما بيبطلش ضحك وهزار ولعب مع الكل
حمدي اخد مكان ادهم في كل حاجه وادهم بدأ يقتنع ان وجوده مش مرغوب فيه وده وجعه قوي….
مصطفي كان مع امل بيساعدها في الكورس لان الانجليزي بتاعه ممتاز ودخلت ميرا عليهم كانوا عند حمام السباحه وقريبين قوي من بعض ومصطفي بيهمس بحاجه في ودن امل وهيا بتتكسف وتبتسم وتبص للارض
ميرا: للدرجه دي قالك حاجه تكسف؟؟؟
امل اتخضت وقامت تجري علي اوضتها
ميرا: سيادتك بتعمل ايه هاه؟
مصطفي: ولا حاجه يا قلبي مالك؟ تحبي نخرج نتعشي مع بعض؟؟؟
ميرا اتضايقت قوي من بروده راحت رايحه ناحيته بعصبيه وفتحتله ايده وحطت دبلته في ايده ومشيت
ليلي شافتها وحاولت توقفها بس رفضت
ليلي: يا مجنون
مصطفي: مجنون ليه دي هيا كده وصلت للي انا عايزو
ليلي: انها تسيبك؟؟؟ اللعبه دي لازم تنتهي بقي
مصطفي: اوعي انا وصلت لغرضي فاضل انتي

ليلي: وميرا؟؟
مصطفي: يوم ولا يومين تستوي وبعدها ربك يسهل
ليلي: انت مجنون يا مصطفي
مصطفي: جوزك فين وحمدي فين؟ لان طالما ميرا استوت يبقي ادهم كمان استوي بس ادهم مش هيتهز بضحكه ادهم محتاج حاجه اكبر من كده
ليلي: لا طبعا انا بره اللعبه كده كفايه.. ادهم بعد عني تماما…. شهر بحاله من ساعت رجوع حمدي وانا بعذب فيه حرام كده
مصطفي: ولما هو عذبك خمس سنين مقالش حرام زيك ليه ما تبقيش غبيه
ليلي: يا مصطفي ادهم مش بيتجنن ادهم بيبعد لانه فاكرني بحبه وممكن يطلقني ساعتها هعمل ايه؟ هاه؟
مصطفي: علشان كده بقولك اننا محتاجين حاجه جامده تخرجه عن شعوره…. سيبيني افكر واقولك اديني يوم ولا اتنين اخططله حاجه كده…
ادهم راجع من شغله ولقي عم حسن في بيته رحب بيه جامد
عم حسن بيتكلم معاه ويدوب هيفتح موضوع مع ادهم فحمدي اتدخل وشد ابوه واستأذن ادهم
عم حسن: في ايه يا ولد شدتني كده ليه؟
حمدي: ما تقولش لادهم انك جاي تتعرف علي اللي هخطبها
عم حسن: ليه بقي ان شاءالله؟
حمدي : انا هقولك
حمدي حكي لابوه كل حاجه

عم حسن: لا ده غلط…. انت بتبعدهم عن بعض…. انت بتفرق بين راجل ومراته…. في فرق بين الغيره وبين انك تحسسه ان في حب قديم وانكم بتصحوه
ادهم ممكن ينسحب من حياه ليلي ويختفي ساعتها هتعملوا ايه هاه؟ تعرف انه سابها خمس سنين
محدش عرفله طريق؟؟؟ لو عملها تاني هتعمل ايه؟ تبقي دمرت علاقتها بجوزها تماما ومش هيرجعلها تاني لانه معتقد انه بيفضيلها الطريق وبيضحي علشان سعادتها اللعبه دي لازم تنتهي
وبعدين اميره اهي فسخت خطوبتها بالولد الغبي مستنين ايه؟ ادهم يطلق وتبقوا كسبتوا؟؟؟
عم حسن معجبتوش خطتهم بس سكت وسابهم وخلص مشواره وسافر
ادهم راجع من شغله بدري عن معاده ودخل اوضه نومه واول ما فتح الباب مراته كانت راقده علي السرير بفستان مغري حبتين ويدوب هيبتسم اتفاجئ بحمدي خارج من حمامه عريان مبلول لافف فوطه علي وسطه وخارج يغني….
ادهم اول ما شافه مش مستوعب ايه اللي بيحصل؟
حمدي: ادهم… سوري بس الحمام في اوضتي مش عارف ماله فاضطريت استعمل ده؟
ادهم: نعم يا اخويا؟؟؟ الحمام ايه؟ ؟ انت بتستعبط ولا بتستعبط؟؟؟ انت ازاي اصلا تدخل اوضه نومي وانا مش موجود؟؟؟ وازاي تقلع كده قدام مراتي؟؟؟
انت اتجننت
ادهم كان بيعلي صوته قوي وليلي خافت من رد فعله