دموع السيف ١١ هايدى الصعيدى

سيف كمل بضحكه وكل القعدين بيضحكوا علي اخرهم

: اول ما نزلت لقيت يوسف في وشي ومن هيأته باين عليه انه متهااان…… ابويا كان كلم ابو يوسف وحكاله اللي حصل وقاله

: العيال دي تبات ع الرصيف يا عادل عشان تتربى
وتعرف ان الله حق دول جرسونا ولاد الكلب

: حضنا بعض ساعتها

سيف : حبيبي يا صحبي

يوسف ضحك ضحكته الجميله ورد

: حبيبي يا زماله

وفضلنا نلف ف الشوارع وكنا هنموت من الجوع

طبعا الكل كان منهار من كتر الضحك

الا تميم اللي كان بيضحك شوية و يتوه في ضحكة ياسمين شوية وقلبه كله حسره بسبب كلامها اللي لسه بيتردد في عقله

: اخص.. حمام يا برووو.. وانا اللي فكرتك واد مقطع

: مقطع اه بس مليش في العتاقي يا كوكو

وغمزله وفارس فهمه و ضحكوا الاتنين

وكمل فارس بفضول : طيب مين قمر وايه حكايه اللباس لحد دلوقتي معرفناش

صباح : قمر دي الغلبانه بنتي اللي اخوك كان ضاحك عليها ومعشمها

: بس متقوليش غلبانه بس دا انا كنت بخاف على نفسي وانا معاها

فارس ضحك وميل على ندى : مش طالعه لختك قمر ليه

ندي بنرفزة: اتلم دي كانت عيله ومش فاهمه حاجه

سيف كمل بنفس الابتسامه اللي مش بتطلع غير وهو بيفتكر صحبه يوسف وذكريات زمان

: اليوم دا واحنا قعدين نلف خدتنا رجلينا لعربية الكبده بتاعة صبوحه حبيبة قلبي بعد طبعا ما خدت التعليمات من البريئة قمر

( قمر دي البنت اللي سيف ادلها جواب يوسف تديه لمريم وكتبلها رقمه على اديها )

: رنت عليا قمر اليوم دا وحنا ع الرصيف ومتكتكين من البرد و سألتني مال صوتك بيتنفض كده ليه فا حكتلها اللي حصل

قمر : وانتوا هتفضلو في الشارع كده دا الدنيا تلج.. وشكلها هتمطر

: هنعمل ايه حكم القوي

: طب بص اتمشي نحيت عربية الكبدة بتاعة امي وحكيلها وهي هتتصرف

: روحنا عند صباح حكينالها وعشتنا

صباح : عشان تعرف اني اصيله يا واطي اومال اسيبكم ف الشارع جعانين و متشحطاطين ع الارصفه

سيف : اصيله يا صبوحه دا انتي استقبالك لحد دلوقتي ف قلبي هو والعلقه بيرنوا في وداني

وقلد صباح

: ادخل ادخل ينجس منك ليه…ملقتوش غير نرجس زبالة الحاره وطلعولها المبوبه يا موكوس منك ليه

ويوسف كان خايف منها اصلا وبيترعش

: والله يا خالتي ما كنا نعرفها

: طب اترزع منك ليه هنا عقبال ما اشوفلكم حاجه عند ابو البنات ينفع تتلبس بدل هدومكم الي اتبهدلت دي