دموع السيف ١١ هايدى الصعيدى

صباح كملت : دخلت كلمت ام سيف وام يوسف وطمنتهم ان العيال بايتين عندي وبعدها خدت غيرين من هدوم جوزي الي الله يرحمه ويبشبش الطوبة الي تحت راسه ودتهم ليوسف والمدعوق اللي جمبي ده وكل واحد اترمه في حته ونام.

سيف كمل : عشان تعرفي انه مش ذنبي … وف نص اليل قامت قمر اتسحبت من اوضتها لما شافتني داخل الحمام وراحت واقفه قدام باب الحمام وستنتني لحد ما خرجت

سيف خارج ماسك في حبل السروال بتاع ابو قمر عشان ميقعش منه فجأه لقا قمر قفشت فيه

: يا بت سيبي اللسروال … يا بت للباس ابوكي واسع هيقع …يابت سيبي… يا يوسف… يوسف الحقني ياض… يا يوووسف
2

: يوسف سمعني وراح مديلي ضهرو ونام

: وانت ملحقتنيش ليه لما كنت ف مطرحك…. الا الشرف يا صحبي لو فرطت فيه مش هعرفك تاني

وفضلت هي تشد وانا شد ودب فيها بالبنية ودي مفيش على لسانها غير وحشتني يا سيف استني بس هقولك حااجه طب هات وحده مشبك بس وهسيبك… لحد ما طلعت صباح على صوتنا وشفتنا وراحت خبطه على صدرها وشههقه

وراحت قلعه الشبش

: ااااه يا نجس يا بن الجزمه … بتزنق البت يا سيييييف

: لا والله بنتك هي اللي زنقاني اسألي يوسف

يوسف عمل نفسه نايم وبيشخر كمان

: صباح كومتنا احنا التلاته فوق بعض وعدمتنا العافيه

صباح : حدالله خدوا علقه مني ساعتها مخدهاش حمار في مطلع

اتنهد سيف بابتسامه وقال : الله يرحمك يا صحبي

الجميع : الله يرحمه

وقفت بعدها صباح وهي بتبص في الساعه

: يخربيتكم الكلام خدنا ده الساعه داخلت على نص الليل قومي يلا يا ندى هاتي دموع في ايدك وتعالي

مها وهي بتحضنها

: ما خليكي قاعده شويه يا صباح وحشتني قعدتك

: معلش يا حبيبتي هنبقا نجيلك تاني ولا ابقي تعالي انتي نورينا بس دلوقتي خلينا نروح قبل ما الجحش اللي متجوزاه البهيمه دي يرجع.. دا هو زمانه كل دا في المستوصف بأمه القرشنه اصلي فتحت قرنها

قالت الاخيره بكل فخر وقامت سلمت على الكل ومشيت ووراها ندى ودموع

بعدها قام تميم وحمم وهو بيقول

: طيب يا مها هانم حضرتك هترجعي الفيلا ولا هتقعدي مع سيف بيه.

: لا يا تميم كلنا هنروح حتى سيف هيجي معانا انا مش هسيبه هنا ويرجع الطور دا و يتخانق معاه تاني

سيف بنرفزه : في ايه يا ماما هو انا عيل ولا ايه

: اسمع كلامي الله يخليك يا ابني انا مش حمل عنادك دا دلوقتي.. ريح قلبي يا ضانيا عشان خاطري