تقف امام النافذة
الجزء الأول. ** تقف أمام النافذة، عيناها على الطريق، اعتصرت الستار بقبضتها الصغيرة اغمضت عينيها وضربه موجعه سددت لمنتصف قلبها ببراعه وهى تراه يتقدم من بنايتهم وخلفه ذويه وتلك الإبتسامه على وجه ايقنتها بأن اليوم الذى كانت تغشاه قد أتى وان الأوان ان تستفيق من أحلامها بخصوصه ، فبعد هذا اليوم سيغدو هو لقلبها من المحرمات.
أطلقت تنهيدة عالية ولم تعى لتلك الدمعه التى هبطت على وجنتها أثناء تأملها له، فتحت عيناها وقد خلى الطريق منه، لتبتسم بسمه صغيرة بحزن، تحكم أغلاق الستار خارجة من غرفتها إلى الغرفة الأخرى المجاورة لها.
** يسبقهم بخطواته المتلهفة لإتمام الوصال بعد سنين من البعاد وقلبه يتراقص على وقع الدقات وعيناه تدندن بلمعتها اعزب الألحان دلف للبناية وقدماه لا تلمس الأرض اسفلها لتعلق والدته خلفه وهى تحاول مجاراته بمسانده شقيقته وخلفهم والده واخاه وزوجته.
_انا ال طاير يا ماما. الام بسعادة لسعادة وليدها ورغم امتعاض وجه شقيقته جوارها عقب تعليقه لتلكزها بيدها: ربنا يتمملك على خير يا حبيبى. مالت على إذن ابنتها : يا بت انسى كلام العيال ال فى دماغك ده وافرحى لفرحة اخوكى.
بسمه: مش بتنزلى من زور مش بلعاها يا ناس هو بالعافية. الام بهمس: اشربيها مع كوباية مياه وهى تتبلع وبعدين هى مش هتعيش معاكى. بسمه: ليه والشقة ال فوقينا دى ال ابنك حاطط عينه عليها وكلم صاحب البيت! الام: يووووه، بكرة يجيلك نصيبك وتروحى بيتك وارتاح من الصداع.
_كده برضه يا سوسو، اهون عليكى؟ _يابت اخوكى واقف على باب الجماعه واحنا لسه فى اول دور، اسحبينى بلاش لكاعه بدل ما يدخل على الناس لوحده! وخلفهم تميل شيماء على زوجها بهمس: انا مش عارفة اخوك عاجبه فيها ايه؟ ده لسه راجع من سفره وش الفجر علطول جرى عليها كده!
فيها ايه زيادة عن اختى يخليه يدلق عليها الدلقة السودة دى؟ احمد بعفوية: لا يا شيماء برضه هتجيبى اسماء اختك لولاء ملكه جمال المنطقة والمناط… صمت يبتلع ريقه متداركا حاله وهو يواجه تلك النظرات الجحيمية المسلطه عليه بمعنى أكمل لو تستطيع بعدما توقفت صاحبتها عن السير تنتظر، ليمسك بيدها يقبلها متملقا.
_ومع ذلك كلها على بعضها كده جنبك صفر على الشمال لا هى ولا عشرة زيها يا حبيبتي . شيماء وهى تواصل السير بعدما لكزته: ايوه كده اتعدل. أحمد بهمس: ربنا يسامحنى على الكدب ده. شيماء: بتقول حاجه؟! أحمد: بقول بالراحه يا قلبى الحركة السريعه غلط عليكى. شيماء بصوت رقيق: خايف عليا.
