تقف امام النافذة
احمد: اومااااال. الاب متجاوزا اياهم: خف انت وهى مش وقته دخلوا. ** _يا بنتى الله يهديكى بلاش فضايح الناس زمانهم جاين، قومى البسى هدومك. _لا، يا ماما لا. _انتى ايه ال جرالك ماكنت…. قطع حديثها دلوف أمانى إلى الغرفة بابتسامة. _الجماعه وصلوا.
_الجماعه وصلوا. اشارت باصبعها على باب الغرفة بعدما صدح جرس المنزل لتكمل بمزاح. _عريسك وصل يا عروسة. “لا رد” سواء من والدتها التى جلست على الفراش بانهاك مطأطأة برأسها لأسفل او من شقيقتها التى عقدت ذراعيها بملامح وجه واجمة جعلتها تعقد حاجبيها بعدم فهم تتسائل . _هو فى ايه؟
صمت لثانيه وقد انتبهت على حال شقيقتها الان. _ وانتى يا ولاء مالبستيش ليه؟ لم تجبها فقط رفعت أكتافها بعدم إهتمام، لتنظر لها والدتها بصوت مهمموم تخاطبها. _اطلعى انتى يا أمانى رحبى بالجماعه وقدميلهم الضيافة وانا جاية وراكى. _أمانى بدهشة: انا!!
_والدتها: ايوه، لازم حد مننا يطلع فروحى يالا ما ينفعش نسيبهم كده. نظرت إلى ابنتها الجالسة على الفراش متابعه: _ ده مهما كان دول ضيوف فى بتنا برضه. وعلى الرغم من اندهاشها، الا انها اذعنت لطلب والدتها، وخرجت للترحيب بهم..
** يقف على الباب يسند باقة الزهور فوق علبة من الحلوى بيده ويد على الجرس يضربه، اتسعت ابتسامته وهو يستمع لصوت قادم من الداخل ينبأ بالقدوم ليعدل من وضعه ويحمل الباقة باليد الأخرى ينتظر وهى ثوان وفتح الباب . _اهلا اهلا يا يحيى فى المعاد مظبوط.
والدة يحيى من خلفه : هو احنا نقدر نتأخر على عروستنا برضه. استاذ توفيق: نورتونا اتفضلوا اتفضلوا. دلف يحيى ووالدته وشقيقته لينظر لهم الاستاذ توفيق متسائلا وهو يهم بغلق الباب لتوقفه يد تجيبه على سؤاله. _هو الاستاذ مؤمن مش جاى ولا ايه؟
مؤمن: وانا اقدر مجيش يوم زى ده؟! بس السن بقا له أحكامه والحركه مبقتش زى الاول والعريس مستعجل يا سيدى لا صابر ولا مستنى حد. اطرق برأسه لاسفل وهو يبتسم وضحكات صغيرة تنفلت منه على حديث والده وضحكات والد عروسه.
انضمت لهم شيماء وزوجها وهى تلتقط أنفاسها من الدرج بصعوبه يعاونها زوجها. يشير لهم الاستاذ توفيق باتجاه غرفة الضيوف ليذهبوا باتجاهها تباعا وعيناه على الممر المؤدى للغرف متسائلا أين هى زوجته؟ عقد حاجبيه وهو يرى أبنته الصغرى أمانى تخرج من الغرفة بمفردها تسير باتجاهه بتوتر ملحوظ، لينطق بما جال بفكره عندما وقفت قبالته.
