روحت المطار
“إيه الجنان ده؟ أنتِ اتجننتي يا نورهان؟ يعني إيه اللعبة اتكشفت؟” زغّرلي وهو بيمثل الغضب.
قمت وقفت براحة، مسكت الموبايل، وفتحت شاشة العرض بتاعة التلفزيون الكبير اللي في الصالة، وعملت “Smart View”.
عرضت الفيديو!
صوت المطار رن في الصالة الواسعة..
*”كل حاجة تمّت خلاص.. العبيطة دي على وشك تخسر كل حاجة.”*
*”أول ما التحويل يكمل، نورهان هتقعد في الشارع، لا حيلتها جنيه ولا ليها حتة تروحها.”*
وصورتهم وهما بيبوسوا بعض عند بوابات الوصول، وصوته وهو بيضحك وبيقول: *”نورهان طيبة وبتصدق بسرعة وده عيبها الوحيد.”*
هشام اتسمر مكانه. لون وشه اتحول من الأبيض للأصفر للرمادي. القلم وقع من إيده، وعينيه كانت هتطلع من مكانها وهو بيتفرج على نفسه شاشة 65 بوصة بصوت وصورة نقية جداً!
“ده.. ده.. إيه ده؟” هشام لسانه اتقل، ومش عارف ينطق.
قربت منه بخطوات هادية، وحطيت إيدي في جيبي: “إيه ده؟ ده فيلمك الجديد يا هشام.. بس النهاية مش زي ما أنت وريماس خططتوا خالص.”
هشام حاول يتدارك بسرعة، جرى عليا وهو بيحاول يمسك إيدي: “نور! افهمي! والله الموضوع مش زي ما أنتِ فاهمة! البت دي كانت بتستدرجني وأنا.. أنا كنت بسايرها عشان الشغل! عشان الفلوس!”
ضربت إيده بعيد عني بقوة: “أنت تبوسها وتبيع شقة أبويا وتعملني مجنونة عشان بتسايرها؟ أنت فاكرني سذجة لدرجة إني أصدق الهبل ده؟”
هشام لما لقى الكدب مش نافع، وش الماسك الحنين وقع، وظهر الوش الحقيقي.. وش الجشع والحقارة.
ضحك ضحكة مريضة وقالي: “طب وكويس إنك عرفتي! تريحي وتستريحي! آه.. أنا وريماس مع بعض، وآه بنحب بعض، والشقة دي خلاص بقت في جيبنا! أنتِ مضيتي على الملحق الأسبوع اللي فات يا عبيطة! الورق في الشهر العقاري دلوقتي، وبكرة الصبح الشقة هتبقى مرعونة للبنك، وأنتِ مش هتعرفي تأخذي مني ولا مليم! على أعلى ما فخيلك اركبيه! روحي اعملي بلاغ.. المشتري شركة رسمية وأنتِ مالكيش حاجة!”
كان بيتكلم بغرور وغل مرعب.
ابتسمتله ابتسامة أشد قسوة، وطلعت من الشنطة ورقة ثانية.. صورة طبق الأصل من الملحق (ب) الحقيقي اللي هو بصم عليه.
“اقرا دي كدة يا هشام.. ولا أنت مبتعرفش تقرا الهوامش؟”
مسك الورقة بإيد بتترعش.. وقرا:
> **”بند رقم 14: أي تصرف في الملكية أو الرهن بدون موافقة كتابية موثقة من المالك (نورهان عادل)، يعتبر العقد ملغياً كأن لم يكن، وتحول ملكية حصة الشريك لشركة (العدل للمقاولات) المملوكة لنورهان عادل، مع إلزام الشريك المتصرف بدفع تعويض فوري قدره 10 ملايين جنيه مصري خلال 24 ساعة، وإلا يعد خائناً للأمانة ومزوراً.”**
