حب مش عادى ٧ ملك ابراهيم
رد عبد الرازق: انا عايز اجوز أنس.. قولت لـ امه تختار له عروسه من عيلة كبيرة.. وقالت لي ان عيلة بدران اللي في البلد اللي جنبنا عندهم بنت في سن الجواز.
الجد مرسي بص لـ ابنه وقال بنبره غامضه: وانت ضامن ابنك؟ ضامن يتجوز ويشيل مسؤولية وتناسب عيلة كبيرة؟
اتكلمت عبد الرازق بضيق: هو دا الحل الوحيد عشان حاله يتصلح.
الجد مرسي بعدم اقتناع: وانا موافق.. بس انا مش هروح اتفق علي جوازه.. عشان انا مضمنش ابنك وعارف انه هيصغرنا مع اي عيلة نروح لهم ونطلب بنتهم.
اتكلم عبد الرازق بأصرار: انا هعزم عيلة بدران هنا الليلة ونفتح الموضوع معاهم.. ولو اتفقنا.. نروح نخطب بنتهم وهجوزه علي طول.. شهر بالكتير وتكون عروسته في القصر.
الجد هز راسه وهو فاهم وعارف ابنه بيفكر في إيه.
رواية مش حب عادي بقلمي ملك إبراهيم.
قدام بيت خالة حبيبة.
وقف رحيم بعربيته وكان بيجيله مكالمات كتير طول الطريق وواضح انه هيكون مشغول طول اليوم.
حبيبة بصت له وقالت بهدوء: شكلك مشغول النهاردة.
رد رحيم: عندي شغل كتير متعطل في المكتب من وقت الحادثة ودخولي المستشفى.
حبيبة اتكلمت بهدوء: ربنا معاك.. انا هقضي اليوم مع خالتي لحد ما تخلص شغلك وترجع.
رحيم ابتسم لها: لو احتاجتي اي حاجة كلميني.
حبيبة هزت راسها بأبتسامة ونزلت من العربية.
رحيم وقف لحد ما اطمن انها دخلت واتحرك بالعربية.
دخلت حبيبة بيت خالتها ولقت خالتها قاعده حزينه وقلقانه عليها.
قعدت حبيبة معاها وطمنتها انها بخير
ميادة بنت خالة حبيبة كانت مبهورة بـ الحكايات اللي كانت بتسمعها من وهي صغيرة عن قصر الجبالي.
قعدت جنب حبيبة بحماس وهي بتسألها عن الليلة اللي قضتها في قصر الجبالي.
ميادة: اوصفيلي القصر من جوه يا حبيبة عامل ازاي؟ بيقولوا ان القصر من جوه حلو اوي.
ردت حبيبة: القصر من جوه عامل زي بيت الرعب كدا.
ميادة شهقت بصدمة..
ابتسمت حبيبة وهي بتكمل كلامها بشرود: لكن فيه مكان مختلفه.. الاسطبل والجنينه الصغيرة.. مكان كدا تحسي انك في عالم تاني.. مكان دافي وهادي وحنين.. تحسي ان المكان بيحضنك وبيطمنك.
ميادة ضحكت وقالت بهزار: المكان اللي بيحضنك وبيطمنك برضه؟
حبيبة بصت لـ ميادة بخجل ووشها احمر وقالت لـ خالتها: سامعه بتقول ايه يا خالتي؟
