حب مش عادى ٧ ملك ابراهيم
ردت خالتها وهي بتضحك: سيبك منها.. المهم طمنيني.. رحيم بيه عامل ايه معاكي ؟
حبيبة بصت لـ خالتها وقالت: مش عارفه يا خالتي.. كل الناس بيقولوا انه غيرهم.. حتى انا شايفه بعيني انه مش زيهم! رحيم مختلف.
اتكلمت ميادة بفضول: قصدك مختلف عن أنس ابن عمه في الشخصيه يعني؟
حبيبة بصت لـ ميادة بنظرة غيظ وقالت: متجبيش سيرة الزفت دا قدامي! فرق كبير بينهم.. مينفعش اصلا اسم رحيم يتحط جنبه اسم أنس في جملة واحدة!
ميادة ضحكت وقالت: خلاص اهدي.. مش هجيب سيرة أنس خالص.. احكيلي بقى عن القصر.
رواية مش حب عادي بقلمي ملك إبراهيم.
في المساء.
قصر عيلة الجبالي كان بيتجهز لعزومة عيلة بدران.
ستات البيت كانوا كلهم في المطبخ بيشرفوا على تجهيز الاكل.
اتكلمت امال ام أنس مع الست هادية ام رحيم بخبث: اومال فين عروسة ابنك؟ من الصبح مش باينه في القصر؟
ردت رباب على امها بغيظ: رحيم خدها وخرجوا من الصبح ولسه مرجعوش.
اتكلمت امال بخبث مع الست هاديه: رحيم لازم يحضر قاعدة الرجاله الليلة وهما بيتفقوا علي جواز أنس ابني.. اصل إحنا هنناسب عيلة كبيرة زينا.. مش زي اللي ابنك راح اتجوزها واحنا منعرفلهاش اصل!
ردت الست هادية بهدوء: كل شئ قسمة ونصيب وكل واحد بياخد نصيبه.
اتكلمت رباب بعصبيه: بس هي خدت نصيبي يا مرات عمي.. كلكم عارفين ان رحيم كان هيتجوزني انا.. وهي اللي ضحكت عليه واتجوزته.
ردت الست هادية: عيب الكلام ده يا رباب.. رحيم مش عيل صغير عشان تقولي ان واحدة ضحكت عليه! رحيم طول عمره راجل وعارف هو بيعمل ايه كويس.. وبعدين لو انتي كنتي من نصيبه، مفيش حد يقدر يغير النصيب والمكتوب!
اتكلمت رباب بتحدي: عندك حق يا مرات عمي.. عشان كده جدي قال لـ رحيم انت هتتجوز رباب ومش هتخلف غير منها هي وبس.
الست هادية بصت لـ رباب بصدمة.
امال زعقت لـ بنتها وقالت لها: وابوكي مش هيوافق علي الكلام ده! لو عايز يتجوزك.. يبقى يطلق البت اللي هو متجوزها.. اه.. انا بنتي متدخلش على ضره.
الست هادية قامت وخرجت من المطبخ وسابتهم.
كانت هتطلع الدرج علي اوضتها وهي مصدومة بعد الكلام اللي قالته رباب..
لكن صوت الجد مرسي الجبالي وقفها: تعالي يا هادية عايزك.
