مش حب عادى ٢٠ ملك ابراهيم

رواية مش حب عادي بقلمي ملك إبراهيم.

في حفل الزفاف.

عبد الرازق كان واقف يستقبل الناس وهو مضايق..

دخل والد حبيبة ومعاه مراته وابنها عاطف.

كانوا مبهورين من تجهيزات القصر.

بعد كام دقيقه نزل رحيم ومعاه حبيبة.

شكلهم كان زي القمر والكل مبهورين بجمالهم وقد ايه لايقين على بعض.

ايد حبيبة كانت بترتجف جوه ايد رحيم.

كل المعازيم كانوا بيباركوا لهم وفرحانين بيهم.

أنس قرب من ميادة ووقف جنبها وهو بيهمس لها وبيبص قدامه عشان محدش ياخد باله: عقبالك يا زفته.

ميادة بصت له بغيظ وقالت بعصبيه: على فكرة هقول لـ رحيم انك بتضايقني بجد.

رد أنس وهو بيبص قدامه: رحيم مش فاضي لـ حد دلوقتي.. مش هيسمعك اصلا.

بصت له بغيظ وقالت: مااااشي.. هتشوف.

واتحركت بعصبيه اتجاه رحيم وحبيبة.

أنس اتحرك وراها بسرعه وهو بيهمس: يا مجنونه هتعملي ايه!

عند رحيم وحبيبة وهما واقفين يستقبلوا التهاني.

قربت منهم بنت بملابس الخدم المنظمين للحفلة.

كانت شايله صنيه عليها كوبايتين عصير.

قدمت كوباية لـ حبيبة.. وكوباية لـ رحيم.

عيونها كانت على كوباية رحيم بتوتر وهو بياخدها منها.

رحيم كان لسه هيشرب لكن صوت ميادة وهي بتقرب منهم وقفه.

ميادة بعصبيه: حبيبة.. رحيم…

أنس قرب منهم بسرعه وهو بيجري وقاطع كلامها وقال: زفته انا كنت بهزر معاكي.

رحيم سألهم بدهشة: في ايه؟

أنس بص لـ رحيم بتوتر وفجأة شاف كوباية العصير في ايد رحيم وقاله: أصلها سمعتني وانا بقول اني نفسي اشرب العصير اللي في ايدك دا.. وبقولها اني كنت بهزر.

رحيم بص له بغموض وقال: العصير برضه ؟؟

أتكلم أنس وهو بياخد كوباية العصير من ايد رحيم: شكلك مش مصدقني يا ابن عمي.. هات كدا.

وخد كوباية العصير وشربها مرة واحدة.

ميادة كانت بتهمس لـ حبيبة وحكتلها اللي أنس بيعمله معاها وانه بيضايقها.

رحيم خد باله وقرب من أنس واتكلم معاه: ميادة بنت خالة مراتي يا أنس.. يعني خط أحمر.

أنس بدأ يحس بألم في معدته وقال: هي دعت عليا ولا ايه؟ بطني بتوجعني اوي..

وفجأة صرخ أنس وهو بيتألم وقال: الحقني يا رحيم بطني بتتقطع.

ووقع أنس على الأرض قدامهم وكوباية العصير وقعت من أيديه اتكسرت