دموع السيف ٢ هايدى الصعيدى

نده برفعة حاجب وهي بتفتح باب العماره

: دا بعينك يا حسين باشا وانا اهو وانت اهو وهنشوف دي اختي الي مجبتهاش امي

خلصت كلامها وراحت خارجه ورازعه الباب ورها

: مين اللي رزع البوابه كده

حسين بص وراه بعد ما سمع صوت امه اللي طلعت على صوت رزع الباب الحديد

: مفيش يا ما اترزع لوحده

: طيب يا حبيبي تعالي عشان عايزاك في كلمتين يا قلب امك

حسين بأرهاق وهو يبدعك دماغه : بعدين ياما حيلي مهدود في الورشه من بدري عايز اطلع اكل لقمه وانام

: تعالي بس دا انا مستنياك من بدري وبعدين وانت هتلاقي لقمه تكولها دا السنيوره لسه واصله

كانت بتتكلم وهي بتسحبه اتجاه شقتها ودخلت وقفلت الباب

واول ما دخل قعدته ع الكنبه وراحت المطبخ غرفت له غدا من الي جهزته دموع من امبارح بليل عشان لو اتأخرت ف الشغل يتغدو مع بعض وهي تبقا تاكل اي حاجه بس في ناس كده تاكل وتنكر ولو ولعتلها صوابعك العشره شمع يقولك مش بطلع دخان من منخيرك ليه
1

حسين يا دوب بيمد ايده وهياكل سمع امه بتعيط
1

: خير يامه بتعيطي ليه.. في ايه
5

الام بتمثيل تحسد عليه من شدة اتقانه

: بقا يرضيك يا بني مراتك تقل مني قدام صحبتها وتسمعني الغلط ع السلم وتخلي وشي قد السمسمه قدام الجيران
1

: طب اهدى بس ياما الزعل دا غلط عليكي… اهدى و احكيلي براحه دموع عملت ايه وانا وديني لجبلك حقك تالت ومتلت

حكت الام وهي بتشهق بتمثيل : بهدلتني يا ضنايا وكل دا ليه عشان بقولها معدتيش عليا ليه قبل ما تطلعي تشوفيني اذا كنت محتاجه حاجه ولا لاء…وتأخرتي ليه متعرفيش ان وراكي راجل محتاج لقمه وهدمه نضيفه ومراته منتظره رجوعه
من الشغل انا غلطانه يا بني كده
1

رد عليها حسين وهو بدأ الدم يغلى في عروقه ويجز على سنانه

: لا ياما مغلطيش… كملي قالتلك ايه الهانم

: يووووه قول ماقالتش ايه دي مخلتليش يا حبيبي رصتهملي رص… زعقت في وشي قدام صحبتها وقالتلي انا جايه من شغلي تعبانه وبعدين مانتي قعده اهو ما ياكل عندك وكفايه القبض الي بتلهفي نصه كل اول شهر وبعدين انا اهم حاجه عندي شغلي والباقي يولع وكلام كتير من دا مش عايزه اقلهولك عشان محرقش دمك
7

: دمى اتحرق واللي كان كان ياما

قالها حسين وهو بيرمي اللقمه من ايده وهو بيوقف بعصبيه واتجه ناحيه الباب وفتحه بعنف وطلع على فوق وهو يباخد السلم في خطوتين وبيستحلف لدموع