مش حب عادى ٤١ ملك ابراهيم

مفيش اي مادة غريبه دخلت جسمه.. وتقرير الاعتـ ـداء اللي بيآكد ان في اعتـ ـداء حصل على مايا.

لقت رحيم ماسك ايديها وعنيه كلها خوف ولهفة عليها..
بكت حبيبة بصمت..
دموعها حر-قت قلبه.

الدكتورة بصت لهم وقالت بهدوء: انا هكلم المعمل عشان ممرضه تيجي تاخد العينه.

خرجت الدكتورة..

رحيم جفف دموع حبيبة وهو بيبص لها بحب وقالها: ممكن بلاش عياط عشان خاطري.

حبيبة بصتله وعيونها مش بتوقف دموع.. قالت بصوت حزين: مش قادرة اصدق ان انت عملت كده.. بس كل حاجة بتأكد ان كلامها حقيقي.

رحيم كان ماسك ايديها وهو بيبص لها.. مفيش حاجة كانت فارقه معاه غيرها هي وبس.. أتكلم بهدوء: لو طلع مليون تقرير يآكد ان انا عملت كده.. انا متأكد ان انا مستحيل أعمل كده…

لمس خدها بحنيه وقال: انا مستحيل المس اي بنت غيرك صدقيني.

حبيبة انهارت اكتر وقالت: ممكن اطلب منك طلب.. وعشان خاطري توافق.

رحيم بلهفة: طبعا يا حبيبتي.

حبيبة ببكاء: انا عايزة ارجع البيت عند خالتي.. مش هقدر ارجع معاك القصر تاني.

رحيم ساب ايديها وهو بيبص لها بصدمة وقال: يعني ايه مش هترجعي معايا ؟؟

قبل ما حبيبة ترد.. دخلت ممرضة عشان تاخد منها عينة د-م للتحليل.

حبيبة سألت الممرضة بدهشة: ليه العينة دي؟

ردت الممرضة: الدكتورة طلبت تحليل د-م شامل.

حبيبة مهتمتش..
والممرضة اخدت منها عينة د-م وقالت: الغرفة جاهزة.

حبيبة بصت للممرضة بدهشة وسألت: غرفة ايه؟

رد رحيم عليها: الدكتورة طلبت ترتاحي في أوضة هنا لحد ما نتيجة التحليل تظهر ونطمن عليكي.

الممرضة خرجت..
وحبيبة قامت من على السرير وقالت: انا كويسة ومفيش حاجة.. انا عايزة امشي من هنا.

رحيم وقف قدامها وقال بنبرة حادة: قولتلك مش هينفع تخرجي من المستشفى قبل ما اطمن عليكي.

حبيبة بصت له وعيونها كانت مليانه دموع.
اتكلمت بحزن: أنا عايزة ارجع عند خالتي ارجوك.

رحيم بص لها وهو بيفكر كام لحظة.. ومسك أيديها وهو بيبص في عيونها وقال: حاضر يا حبيبة.. رغم ان انا مش هستحمل تكوني بعيدة عني.. بس لو انتي عايزه كده وهتكوني مرتاحة.. انا هعملك اللي انتي عايزاه.. بس انتي كمان لازم تسمعي كلامي.. هترتاحي في الغرفة اللي الدكتورة قالت عليها لحد ما نتيجة التحليل تظهر وانا اطمن عليكي.

ردت حبيبة بحزن: انا مش تعبانه صدقني يا رحيم.. انا عايزة امشي من هنا.