مش حب عادى ٤١ ملك ابراهيم
رحيم خرج من الغرفة وحبيبة خرجت وراه وهي بتبكي وحزينة.
رحيم بص لـ أنس وقاله: انا هاخد حبيبة اوصلها بيت خالتها.. وانتوا ارجعوا القصر.
ومسك ايد حبيبة عشان يمشوا.
صوت أسامة وقفهم وهو بيقوم من مكانه: معقول هتمشي قبل ما تقولنا هتعمل ايه في المصيبة اللي انت عملتها دي يا حضرة المحامي ؟ انا معايا تقرير من المستشفى بيثبت اللي حصل وعايز اعرف انت ناوي على ايه قبل ما اخد إجراءاتي ضدك.
رحيم بص له بنظرة غامضه وقال: هعمل اللي المفروض يتعمل متقلقش.
أسامة اتوتر وبلع ريقه بصعوبه وهو بيسأله بارتباك: قصدك ايه؟
رحيم بص له بنظرة باردة ومردش عليه.
مسك ايد حبيبة ومشي.
أسامة بدأ يقلق من رد فعل رحيم.
بص لـ اخته اللي كانت بتبص له بتوتر.
خديجة قربت من جوزها وقالتله: اطمن يا أسامة.. رحيم أخويا مستحيل يتخلى عن مايا بعد اللي حصل.
أسامة بص لها بغضب وقال: انا مش عايز أخد أي اجراء ضده لحد دلوقتي عشان هو خال بنتي.. بس عرفيه انه لو مطلقش مراته واتجوز اختي وصلح غلطته.. انا مش هسكت.
اتحرك من قدامها وهو بيقولها بغضب: خلي ابن عمك يرجعك عشان انا هاخد اختي معايا في العربية.
وقرب من مايا وخدها ومشي.
أنس بص لـ خديجة وقالها: يلا يا خديجة خلينا نرجع القصر.
رواية مش حب عادي بقلمي ملك إبراهيم.
قدام بيت خالة حبيبة.
وقف رحيم بعربيته وهو بيبص قدامه وساكت.
حبيبة بصت له وهي بتبكي وسألته بصوت مبحوح: انت هتتجوز مايا؟
رد رحيم ببرود وهو بيبص قدامه: مش هو ده اللي انتي عايزاه يحصل !
وبص لها وقال: بيت خالتك قدامك.. لو حابه ترجعي معايا.. هتحرك بالعربية حالا.
حبيبة بصت له بحزن وهي بتفكر.
بعد كام لحظة من التفكير.. فتحت باب العربية.
رحيم غمض عنيه بحزن وهي بتنزل.. كان نفسه ترجع معاه وتقوله هفضل جنبك.
قفلت الباب بعد ما نزلت وهي بتبكي.
هز راسه وقالها: ادخلي بيت خالتك يا حبيبة وانا هطمن انك دخلتي وامشي.
اتحركت بخطوات مترددة..
قلبها بيقولها ترجعله وتفضل معاه.
لكن عقلها بيلومها ومش عايزة تكون انانيه..
شايفه ان مايا دلوقتي احق بيه منها.
خبطت علي بيت خالتها..
ميادة فتحت لها الباب وحضنتها بقلق.
اول لما اطمن انها دخلت.. كان لسه هيتحرك بعربيته لكن مكالمة من أنس وقفته.
رد على المكالمه وسمع صوت أنس بيقوله بفزع: رحيم.. ارجع بسرعة على القصر.. رباب كلمتني دلوقتي وقالتلي ان جدي تعبان اوي بعد ما عرف اللي حصل .. رباب الغبية دخلت حكت له كل حاجة.. انا كلمت الدكتور عشان يجي.. انا في الطريق وخديجة معايا قربنا نوصل.
