لأجلها ٣ أمل نصر
توقف يعلو صوته مردفا :
– تجولي انت ماشي كدة ورايح فين؟ لحقت تنسى كلامنا واللي اتفقنا عليه امبارح؟
ضرب حمزة بقبضته على مقود السيارة بغيظ شديد يصيح به بسخط:
– وهو ايه اللي اتفقنا عليه يا بلوتي السودة انت؟ دا يدوب اللي عدى بس سواد الليل، هلحق امتى بس اتكلم ولا اتزفت؟ انت هتشلني من اولها ياض؟
ضحك بسماجة يتقبل صياحه بتملق:
– وماله بس يا كبيرنا؟ ما انت برضك البريمو ومفيش حاجة صعبة عليك، دا انا اتوقعت اصحى الاقي أمي فوق راسي تزغرد لي فرحانة بعد ما تقنعها انت بذكائك معاها.
– اممممم
زام بفمه ساخرا معقبا على كلماته:
– يا حبيبي يا عسل انت، تزغردلك كمان! شوف ازاي يا اخوي، دا على كدة الموضوع ساهل جوي وانا مش دريان، يا ريتني في نص روقانك والله
– طب وايه اللي يمنع بس انها تفرحلي وتقتنع، مش هي برضو عايزاني اتجوز، ولا يعني هتحب بت عمي اكتر مني؟
تمتم حمزة بالاستغفار، يستحضر الهدوء حتى يتعامل مع هذا المتعجل:
– لا طبعا مفيش الكلام ده، هي بس مفاهيم غلط ومتمسكة بيها، ع العموم كل حاجة وليها حل، المهم بس انت ترسي انت كدة وتعجل، ثم كمان احنا لسة معرفناش البت ولا ناسها، كل اللي عرفناه هو اسم عليتها، اديني فرصة اسأل عليهم واطجس عشان افاتح امك بقلب جامد لو طلعت بنت ناس زينة
– اكيد هتطلع بنت ناس زينة، انا متأكد منها دي
تمتم بها معاذ بثقة ينقلها لشقيقه الحانق، ليعقب بغيظ:
– طيب يا غالي، مش ناوي تقولي رايح فين بالظبط ولا اوفف انزلك هنا؟
أجابه بلهجة تخللها الفتور قليلا، وقد هبط حماسه بعض الشيء بعد تحذير حمزة:
– لا امشي على طول، توصلني للمدينة الصناعية في طريقي اجيب الموتوسيكيل من ورشة التصليح
-❈-❈
داخل منزل عرفان وقد أخبرته زوجته بما تم من مزيونة وعدم اعترافها بالأمر من الأساس، لتضيف من عندها ما يزيد من تأجيح الغضب بداخله:
– دي كان ناقص تطردني، كلام كتير خربطت بيه انا نفسي مقدرش اجوله، كأنها اتفرعنت ومحدش مالي عينها، او تكون خلفت بتها لوحدها من غير اب ليه كلمة عليها زيه زيها.
يسمع منها بصمت ابلع من اي حديث، انه زوجها وهي تعمله جيدا، معنى سكوته هو الخطر بذاته.
– انا من رأيي تعتذر لشريكك وخلاص يا عرفان، مزيونة شكلها مش هتجيبها لبر واحنا مش ناقصين فضايح.
جاء رده مستنكرا بعنجهية يخرج عن صمته:
– اتهبلتي يا مرة انتي ولا اتجنيتي؟ مين دا اللي يرجع ف كلمته، ولا مرتي مش هقدر امشي كلمتي عليها ولا احكم بتي، اهمدي وكني وملكيش دعوة انتي .
