لأجلها ٣ أمل نصر
– عيني عليك باردة
تحرك من محله ليقترب منها ويقبل رأسها بحب، ثم هم ان يتحرك ليتناول ساعته الموضوعة على الكمود المجاور، ولكن، وقبل ان يفعل اوقفته هامسة:
– شكلك سمعت كلامي ونصحته.
طالعها بعدم فهم مستفسرا:
– كلمت مين؟ انا مش فاهم حاجة.
غمزت بعيناها تجيبه:
– هتلف وتدور عليا، ما انكشفت وانا عرفت خلاص، خدتو على جمب وروحتو تتودود في الليل انت وهو في الناحية التانية من البيت؟ يعني هيكون ليه؟ مش عشان تفتح معاه ويفتحلك قلبه بعيد عن الكل ومحدش يسمعكم، مرة اخوك شافتكم وبلغتني.
– هااااالة
تمتم بالأسم يحرك رأسه بتعب واستدراك، فها هي ابنة عمه العزيزة؛ التي تدور كالنحلة في المنزل حتى لو في نصف الليل حتى لا تخفى عليها خافية، وتفاجأه دائما باكتشافاتها:
– قولي بجى جالك ايه؟ عرفت تقنعه، ولا شديت عليه عشان يسمع النصيحة .
– لا دي ولا دي ياما
تمتم بها حمزة يحبط احلامها مستطردا:
– ولدك مكانش جايله نوم، وحب يتساير معايا مش اكتر من كدة.
طالعته حسنية بتشكك ليردف بالمزيد علها تصدق:
– انا هافاتحه يا أمي بس لما احس انه على استعداد، يعني واحد بيقولي ان اهم حاجة عنده الوظيفة دلوك، جوم انا اقوله، لا لازم تخطب بت عمك، الصبر شوية يا أمي، الدنيا مطارتش
في استجابة منها غير مريحة، مصمصمت بشفتيها تشيح ابصارها عنه بعدم رضا قبل أن تقول”
– ماشي يا حمزة نصبر شوية، المهم بس تعرف تكلمه وتيجي تطمني، ميبقاش موضوعنا معلق كدة، عايزين حل عشان نخلص.
انهت حديثها وتحركت مغادرة الغرفة من أمامه، ليزفر بضيق ثم يرفع رأسه للسماء بحيرة، بعد وضعه في هذا الموقف الغريب، وهو مطلوب منه ان يرضي الاثنان، شقيقه الذي وجد حب عمره كما يقول، ووالدته التي ترى في ارتباط ابنها الأصغر بابنة عمه امر لابد تنفيذه، اذن كيف يوفق بينهما؟ ليتفوه معبرا عما يكتنفه؛
– يا غلبك يا حمزة
٠٠٠٠٠٠٠٠٠٠٠٠٠٠٠٠٠٠٠٠٠٠٠
جالسة بكل هدوء، وبرود تدعيه في الإستماع إلى ما ما كانت تخشاه، وها هو يتحقق امامها الان وبقوة، وعلى لسان تلك الملعونة، التي تخبرها وتتحدث بلهجة أقرب ما تكون إلى الشماتة، وهي أعلم الناس بها، لكنها ابدا لن تظهر الضعف امامها حتى لو كانت العواصف التي تدور داخلها قادرة على خلع ثباتها من الجذور
– الجماعة اتصلوا الصبح وبلغوا عرفان، الواد باين امه حمسته عن ليلى وحلاوتها، صوته في التلفون مبين جوي انه فرحان، أمال لما يشوفها على الحقيقة النهاردة، دا هيسمك فيها بيديه وسنانه على كدة ، مش بعيد عقله يطير منه، اه أمال ايه، احنا عروستنا مش اي كلام .
