العاصفة ٤ الشيماء محمد

محمد بص لأخوه وحاول يعتذر : عبدالله صدقني …….

قاطعه عبدالله : محمد زي ما أم طه قالت متشكر لإهتمامك احنا هنطلع نشوفها فين وأنت بس لم مراتك وبنتك وبلاش تخليهم يرغوا في سيرة البنت لحد ما نرجع هتقدر ولا ده كمان صعب عليك ؟

محمد بسرعة : لا هقدر طبعا بس استنى اجي معاك .

طه بسرعة : لا يا عمي معلش هنتحرك احنا وبعدين العربية مفيهاش مكان أصلا هنتحرك كلنا ونرجع إن شاء الله بأمل فمش هيكون في مكان .

محمد انسحب وكلهم ركبوا واتحركوا في صمت ودعوات مالية قلوبهم وثقة في ربنا انه معاهم ..

************************

حمادة وعلي انتظروا زميلهم الدكتور يطمنهم عليه وأول ما خرج جريوا عليه

حمادة : حالته ايه يا دكتور !

الدكتور : هو محظوظ لان الضربه مش عميقه أوي .. هياخد الأدوية بتاعته وهيكون كويس ما تقلقوش

حمادة بص لعلي والدكتور انسحب ..

حمادة كمان طلب من ممرضة تعالج جروحه وبعدها بص لعلي وهمس : احنا دلوقتي ناخد زكريا ونخلع من هنا

الجو بدأ يتعدل وممكن يقفشونا يلا

حمادة طلع هو وعلي وهربوا بصاحبهم من المستشفى .. اتفقوا ينتظروا صاحبهم يفوق ويهربوا لاي مكان لحد ما الوضع يهدأ ويستقر ..

ملك دخلت عند كريم وبتعيط وبتعتذر إنها مش متوافقة معاه وساندة على ايده بتعيط .. دخلت عليها ناهد حطت ايدها على راسها

ملك بعياط : ما ينفعش أتبرعله .. أنا ممكن اديله روحي مش بس كلية بس ماينفعش .. جسمه مش قابلني .

ناهد بعياط : حبيبتي ما تقوليش كده ماهو أبوه اهو ومش متوافق معاه .. بس أكيد هنلاقي متبرع ما تقلقيش ربنا مش هيتخلى عننا وهنلاقي .

ملك مسحت دموعها : حتى مؤمن برضه مش متوافق .. هنلاقي امتى وازاي وفين ؟

ناهد اخدت نفس طويل : ربنا كرمني بيه وأكيد مش هياخده مني تاني .. مش عارفة مين وامتى وازاي وفين بس عارفة اننا هنلاقي حد ..

كريم اتحرك والاتنين اتلفوا حواليه

ناهد بلهفة : كريم حبيبي أنت سامعني أنت كويس ؟

ملك بعياط : كريم أنا هنا جنبك .

كريم مش سامعهم ولا حاسس بيهم وما نطقش غير جملة واحدة : أمل ! أمل فين يا أمي ؟

ملك اتراجعت ومش عارفة أصلا مين أمل اللي بيسأل عنها أما ناهد فقربت من ابنها : كويسة يا حبيبي اطمن أنت ووعدك محفوظ ما تخافش .

كريم غاب تاني عن الوعي وملك بصت لناهد وألف سؤال ظاهر في عينيها