منعطف خطر ٣٨ ملك ابراهيم
قعد هو في الصالة،
حاسس إنه السبب في الحالة اللي وصلت ليها ،
وإنه ظلمها من غير ما يقصد،
وبيسأل نفسه:
إزاي يداوي جرح طلع من ناس المفروض انهم أهله؟
إزاي يصلح اللي كسروه جواها؟
وإزاي يطمن قلبها… اللي اهله واقرب الناس ليه كانوا السبب في وجعه؟
تليفونه رن…
كان رقم والده.
خالد رد بسرعة،
أبوه كان قلقان وعايز يطمن على ياسمين.
عرف منه عنوان شقته الجديدة، وقاله إنه جاي في الطريق.
جوه الأوضة…
ياسمين كانت قاعدة على السرير،
وعنيها متغرقة دموع.
الحزن ماسك قلبها بقوة،
حاسّة إنها اتهانت…
عمرها ما كانت تتخيل إن ييجي اليوم وتتحط في موقف زي ده ، واهل جوزها يطردوها من بيتهم.
كلام حماتها لسه بيرن في ودنها،
كل كلمة كانت زي سكينة بتغرز في قلبها:
“اخرجي من حياة ابني.”
كانت الكلمة دي بالذات بتدوّي جواها وبتكسرها أكتر.
بعد شوية،
سمعت صوت دق خفيف على الباب،
عارفة إنه هو…
عارفة إنه دافع عنها ووقف قدّام أهله عشانها،
بس جواها وجع تاني…
هي حاسة إنها غلطت من الأول.
حاسّة إنها رخصت نفسها لما وافقت تتجوزه من غير ما أهله يطلبوها رسمي.
بس افتكرت بسرعة إن خالد اتجوزها عشان يحميها،
عشان ينقذها من جحيم جدها ويحيى…
قامت بخطوات مهزوزة،
وفتحت الباب.
كان واقف قدامها،
عنيه مليانة وجع،
شكلها وجعه…
وشها متورم من البكاء، وعنيها حمرا.
قال بصوت هادي:
– بابا هنا… جاي يطمن عليكي.
ياسمين مسحت دموعها،
وخرجت معاه من غير ما تنطق بكلمة.
في الصالة…
سالم الدريني كان قاعد،
أول ما شافها وقف على طول.
كانت حالتها مكسّرة قلبه.
في إيده ورد وشيكولاتة،
مدّهم ليها بابتسامة خفيفة وقال بحنان:
– أنا جاي أعتذرلك على اللي حصل في بيتي…
هتقبلي اعتذاري ولا هتحرجيني؟
ردت بسرعة وهي بتحاول تتحكم في دموعها:
– اعتذار إيه؟ حضرتك دافعت عني…
أنا اللي المفروض أشكرك.
ابتسم لها بحنية،
وقعدوا،
وخالد قعد قدامهم، ساكت،
بس عنيه كانت متثبتة عليها،
بيراقب كل نفس بتاخده، وكل دمعة لسه فاضلة في عينها.
سالم بص لها وقال:
– انتي لسه متعرفيش بهيرة حماتك…
هي طيبة، بس اتربت على إن كل حاجة تمشي على مزاجها.
أبوها الله يسامحه هو اللي غرس فيهم الحتة دي…
هي وأختها عبير الاتنين نفس الطبع.
بهيرة معندهاش مشكلة شخصية معاكي،
بس تقدري تقولي بتجامل أختها عبير على حسابك.
عارفة إن عبير من ساعة ما عرفت إن جوزها كان متجوز واحدة تانية ومخلف منها،
وهي اتجننت…
حاسّة إن ده جرح كبرياء بنت اللواء اللي شايفة نفسها أعلى من الكل.
