نوفيلا عيون معصوبه بقلم دفنا عمر

وجدتها تطرق بابها في الصباح حاملة معها حقيبة كبيرة تحوي بعض الخضار والبقولات والأرز وأكياس مكرونة منوعة الأحجام ودجاجتين وكيسان من اللحم المقطع ..

نظرت رضوي لما وضعته أمامها هاتفة بدهشة:
ايه ده ياحماتي اللي انتي جايباه مش فاهمة؟
_ مش فاهمة ايه؟ حبة خضار ونواشف علي فرختين واتنين كيلو لحمة لوازم الشهر..ثم وضعت براحتها ورقات نقدية قائلة: ودول 500 جنيه عشان لما تعوزي تشحني انتي وبناتك..

مازالت رضوي لم تستوعب، فتساءلت: لوازم شهر ايه؟ و 500 جنيه بتوع ايه؟!..
هتفت بضجر: يوه.. انتي اللي طالع عليكي ايه ايه؟ دول خزين مطبخك وتلاجتك وقرشين تشحني بيهم الموبايلات بتاعتك انتي وبناتك..

حاولت أن تحافظ علي تعقلها وهي تقول بهدوء زائف: أنا جوزي باعتلي ” 5000جنية”..هما فين؟

_ خمس ايه يا عين امك؟ ليه؟ عشان تصرفي علي مكياجك ولبسك والحاجات الفاضية اللي بناتك بتشتريها؟ لا يا نين عيني أنا شقي ابني مش هيروح على الفاضي..ده ظروفه صعبة ولازم يلم نفسه..

ثم حذرتها بوجه شيطاني: وإياكي تروحي تشتكيني عنده، يمين بالله هقلب الدنيا عليكي واقول انك بتفتري عليا وفي الأخر هيصدق امه حبيبته وهيخاف تغضب عليه وهيكدبك انتي، فاهمة ولا مش فاهمة؟

رمقتها بجمود بائس وهي تعرف صحة ما تقول.. يونس لا يكذب والدته قط ويخاف غضبها أكثر من أي شيء أخر..للأسف كفة صدقها خاسرة أمام حديثها الكاذب.

راحت ترمق الأشياء التي أحضرتها بشرود، ثم اتخذت قرار ربما يكلفها الكثير من أعصابها ويستنفذ صبرها وسلامها النفسي.. لكنه معركتها الأخيرة، إما ربحتها.. أو خسرت كل شيء..
___________

_ عملتي ايه يا أمي؟ قولتي لاخويا يونس يبعتلي مبلغ اوضب شقتي؟ حمايا عمايل ينغزني بالكلام في جنابي كل اما ازورهم..
_ اصبر.. قريب اوي هتاخد مبلغ حلو في ايدك
صاح بفرحة: يعني اخويا هيتعتلي؟
_ لا أخوك مايعرفش حاجة، أنا اتصرفت في جمعية بألفين جنية في الشهر.. هقبضها أربعة وعشرين ألف علي المبلغ اللي انا مدكناه علي جمب.. تلم بيهم شقتك وعفشك وتتجوز..

قبل رأسها مهللا: ربنا يخليكي ليا يا أمي.. بس ازاي قدرتي تدخلي جمعية بألفين جنية مرة واحدة واخويا مش هو اللي بيبعتلك فلوسها؟

غامت عيناها هامسة: أتصرفت.
________

مضت الأيام ثقيلة وهي گ قنبلة موقوتة تنتظر الانفجار فى اى لحظة، كلما بصرت شحوبها هي وبناتها تتحصر حالهم، لم يعد متاحا لهم الكثير من الأمور.. لا نزهات.. لا زيارات تستلزم نقود أضافية..كما تجنبت الذهاب لبيت والديها كما جعلتهما لا يزورها بحجج كثيرة، تدبر حالها بالقليل التي تحضره والدة زوجها كل شهر مع مبلغ الخمسمائة جنية..
…… .
أبرار: ماما.. أحنا ليه مش بنخرج زي ما كنا مع بابا
حفصة: والأكل قليل اوي ومافيش فاكهة وحلويات وبيتزاهت وشيكولاتات من اللي بنحبها.. بابا كان بيجيب حاجات كتير حلوة
رهف: وكمان أنا وحفصة نفسنا ناكل كنتاكي في المطعم زي ما كنا مع بابا..
_ معلش يا بنات استحملوا شوية.. بابا هايجي قريب وهو هيجيبلكم كل حاجة نفسكم فيها..
حفصة: طب رمضان قرب.. هتجيبلنا فوانيس زي ولاد وبنات عمي؟
تنهدت وقالت: إن شاء الله هجيبلكم، يلا عشان تتعشوا وتناموا
أبرار: طب ما ينفعش تعملي لينا بيتزا يا ماما؟
_ مكوناتها مش موجودة ياحبيبتي.. معلش هانت وهعوضكم كل ده..