قلوب حائرة روز آمين
رفعت سُهير أحد حاجبيها وتحدثت باستنكار:
-وهي لما تهين بنتي في الطلعة والنازلة يبقي كدة بتعبر عن حزنها يا داليدا؟
لوت راقية فاهها يميناً ويساراً وهمست لزوجة فريد صلاح التي تجاورها الجلوس:
-شوفي يا اختي البت وامها،قال بتقول لك وجعها،دي الولية ما نزلتش دمعتين علي بعضيهم علي بنتها
واسترسلت بإبانة ساخرة لكرهها الشديد لشخصية قسمة وتعاليها:
-طبعاً،تلاقيها خايفة تتفضح قدامنا،بالك إنتِ قسمة دي لو عيطت،الدهانات اللي علي وشها دي كلها هتسيح والألوان هتدخل علي بعضها،وساعتها أراهنك لو عرفتي تفرقي بينها وبين عزت البواب
وضعت المرأة كفها فوق فاهها لتكظم ضحكتها التي حضرت عنوةً عنها بعد حديث تلك المرأة الساخرة التي لم تكتفي بهذا القدر وكادت أن تُكمل لولا يُسرا التي تحدثت قائلة بتعقل وهدوء:
-خلاص يا جماعة بالله عليكم تسكتوا،كفاية اللي إحنا فيه،كُلنا موجوعين من إمبارح علي ليالي ومش مستوعبين اللي حصل لها،فلو سمحتوا نلتزم الهدوء إكراماً لروحها الطيبة،ليالي ماتستحقش إننا نقلب العزا بتاعها لحرب ومناوشات ونفرج علينا الناس
لوت راقية فاهها وتحدثت بنبرة تنظيرية:
-الحمدلله إن اللي موجودين كلهم ستات العيلة ومحدش غريب وسطينا،كنا إتفضحنا قدامهم وبقينا لبانة في بُق اللي يسوي واللي ما يسواش
إلتزم الجميع الصمت وبعد قليل صعدت سُهير بجانب سلمي لرؤية مليكة وشيرين وتقديم واجب العزاء إلي حمزة المتألم لفراق والدته والذي لم يغادر غرفتهُ مُنذُ علمهِ بالخبر،كانت شيرين تحتضن الفتي وتربت علي ظهرهُ بحِنو في محاولة منها للتخفيف عنه من تأثير الصدمة،أردفت سلمي بنبرة خافتة إلي شيرين:
-البقاء لله يا مدام شيرين
أجابتها بنبرة حزينة باكية:
-لا إله إلاّ الله،الدوام لله وحده
إقتربت سُهير من الفتي ثم وضعت كفها ومسحت به علي شعر رأسه وسألته بنبرة حنون:
-عامل إيه يا حبيبي؟
الحمدلله يا تيتا…نطقها بصوتٍ مبحوح نتج عن كثرة بكائهُ الذي لم ينقطع مُنذُ الأمس حينما عَلم بالخبر المشؤوم
ربتت مليكة علي كف الفتي وتحدثت:
-قوم يا حبيبي خد شاور وغير هدومك علشان تجهز وتتحرك مع جدك واعمامك
واسترسلت بإبانة:
-هدومك جوة في الحمام
أومأ لها وبالفعل تحرك لداخل الحمام وتحدثت شيرين بعدم استيعاب:
-أنا لحد الوقت مش مصدقة الخبر،معقولة ليالي يحصل فيها كدة،طب ليه وعلشان إيه يأذوا بني أدمة بريئة بالشكل البشع ده
