بكل الحب

– لو مرهق ممكن نتعشي هنا بلاش نخرج .

حمحم بقوه يستعيد نفسه وهو يقف ومن ثم قال :

– لا , أنا تمام ….

نظر لها قليلاً ثم أكمل :

– علي فكره الفستان ده هيبردك .

قطبت حاجبيها باستغراب تردد :

– هيبردني ؟

أومئ بثبات وأكمل :

– آه , أنتِ مش لسه قايله أن في هوا بره .

– ايوه بس مش لدرجة أنه يبردني .

– لا أنا لسه جاي من بره وعارف أنا بقولك اي , وكمان الروج ده أوفر شويه شكله مش حلو , ده مجرد عشا مش فرح يعني .

– فرح!

رددتها بذهول وهي تنظر له , ماله يتحدث هكذا ! , عن أي برد يتحدث في شهر مايو الحار ! , حتي وإن كان هناك بعد الرياح فهي رياح دافئه , وما دخله إن كانت حمرة الشفاه زائده أم لا ! .

وكأن روح الأنثي العنيده التي بداخلها ثارت علي حديثه الفج من وجهة نظرها , ألم يقل سابقًا أن لا يتدخل أحد في شأن الآخر !

عقدت ذراعيها أمام صدرها ببرود وقالت :

– لا الروج مش أوفر ده الي بحطه في العادي , وكمان أكيد مش هبرد في الصيف يعني ! وشكرًا لإهتمامك ممكن نمشي .

تنهد بغيظ قبل أن يومئ بصمت متوعد , استقلوا سيارته وسار بها حتي وصلوا أمام أحد المطاعم , ترجل سريعًا وكادت تفتح هي الأخري بابها لتترجل حين وجدت يده تغلق الباب وهو يقول بابتسامه صفراء :

– لحظه أشوف في مكان جوه ولا لأ , المطعم ده دايمًا زحمه .

نظرت للمطعم ثم قالت :

– المطعم ده بالحجز أصلاً أنت حاجز ؟

– لا , بس لو في مكان هنقعد.

– طب ماتيجي نقعد في مكان تاني !

ابتسم ببرود يقول :

– مبرتاحش غيرهنا .

تركها واتجه للداخل , غاب لأكثر من نصف ساعه , حقًا أنتابها الملل كثيرًا , وكلما دقت له علي الهاتف يفصل الخط , رأته يأتي وبيده حقائب كرتونيه عليها إشعار المطعم , دلف للسياره ووضع الحقائب بالمقعد الخلفي وقال :

– فعلاً المكان زحمه , قلت أجيب دليفري وخلاص ..

كاذب , المكان لم يكن ممتلئ بل هو من تعمد هذا , ربما لن يقدر علي جعلها تغير ثيابها أو تقلل زينتها , يعلم ردها عليهِ إن أصر علي هذا , ومن الأساس لا يرغب في أن يبين له حنقه علي ما ترتديه , فتصرف بذكاء ماكر كي يصل لمبتغاه .

شهقت بصدمه تقول :

– يعني ملبسني ومنزلني عشان نجيب دليفري ونرجع ! هو مفيش غير المطعم ده!

– قلتلك مبرتاحش غير فيه , كمان مين قالك أننا هنروح ده أنا هاخدك مكان عظمه دلوقتِ .