بدايه جديده

عيطت بانهيار و قالت: حرام عليك يا خالد

خالد اتعصب اكتر و قال: حرام عليا ،علشان بطلب حقي الشرعي.

سدرة: انا قولتك قبل الجواز أن عندي حالة نفسية و انت قبلت بالموضوع

خالد: كنت فاكر الموضوع مش هياخد وقت طويل، بس اكتشفت انك ديما تقولي معلش مش قادرة ، و انا بحاول اكتم غضبي و اقول معلش أتحمل،بس الموضوع زد عن حده ، انتي مراتي يا سدرة و من حقي غصب عنك، و بطلي دلع ملوش لازمة

سدرة ضحكت من كتر ما هي مصدومة من كلامه و قالت: انا بتدلع ، انا بقالي سنين بتعالج و لسه زي ما انا و كل ما أحاول اتعالج انت تكون سبب الانتكاسة،بسبب كلامك و أفعالك

خالد: دلوقتي بقيت انا السبب

سدرة : محدش ضربك على ايدك ،انا قولت كل حاجه من اول مقابلة بينا و انت وافقت مش ذنبي انك كنت حبب تعمل فيها البطل و انت مجرد بطل من ورق.

اول ما قالت كده، ضربها بالقلم و خرج و ساب الشقة .

قعدت مكانها بصدمة و افتكرت كل ذكرياتها السيئة ضرب امها و جوز امها و تعدى جوز امها عليها.

بصت على ابنها فريد اللي عمره شهور و خدته في حضنها و هي منهارة،و طلبت امها و قالت: أنا عايزة اطلق يا ماما

نفخت امها بضيق و قالت: انتي كل يومين تتصلي تقولي كده اعملي اللي يريحك بس ملكيش مكان هنا

سدرة: طيب اروح فين

أم سدرة: في داهية، انا مصدقت خلصت منك و من كذبك على جوزي

صرخت سدرة: انا مش بكذب جوزك اتعدى عليا و أنا لحد دلوقتي بتعالج بسببه ،منه لله ،و منك لله ،علشان انتي خاسرة فيكي كلمة امك،اسمعيني كويس انتي لو بتموتي ،فاهمة لو بتموتي ،هقف اتفرج عليكي بسعادة..

و قفلت السكة و هي منهارة و قالت : كده يا فريد مينفعش طلاق علشان ملناش مكان ، يبقي أتحمل ابوك و أمه و اخواته البنات و ربنا يصبرني عليهم ..

مرجعش خالد البيت و بات في شقة امه اللي تحت علشان يبان ل سدرة أنها غلطانة
////////
في شقة ام خالد

سدرة بتعمل شغل البيت و أم خالد و اخواته البنات يتامروا عليها

أم خالد( حكمة) : سدرة فين الشاي

خبطت سدرة على الحوض و قالت: يارب صبرني ،قاعدين برة زي المشلولين و انا أخدمهم..

خرجت سدرة و هي بتقول : الشاي يا حماتي

حكمة : كل ده على ما تعملي كوبية شاي

سدرة: أنا مش بعمل كوبية شاي بس، انا بعمل الغداء و بدل ما تطلبي مني انا ،كنتي طلبتي من نور أو سها ،قاعدين جنبك اهما.