بدايه جديده

اسر: ابدي انتي

سدرة: لا انت الاول…

ضحك أسر و قال: السيدات اولا

سدرة : طيب اسمعي يا سيدي حكايتي ، انا اتجوزت أبو العيال جواز صالونات كان عنده ٣٠ سنة و انا عندي ٢٠ سنة و من اول قعدة مع بعض كنت صريحة معه في كل حاجه.
و مجرد ما افتكرت اللي حصل نزلت دموعها
////////(/((((
فلاش باك

في الرؤية الشرعية قالت سدرة:
أنا هقولك كل حاجة،، و ليك حرية الاختيار

ابتسم خالد وقال: اتفضلي يا آنسة

بصت سدرة على الأرض بخجل و قالت: أنا حياتي صعبة جدا، بابا مات و انا صغيرة. و أمي اتجوزت راجل بالاسم ، حسبي الله و نعم الوكيل فيه.

عدلت طرحتها و تحاول تدري التوتر و هي بتقول: كان بيتحرش بيا و لما ادفع عن نفسي و أقاوم كان يضربني ويمنعني من المدرسة، و كل ما قول ل ماما، تقولي ده ابوكي و انتي صغيرة و مش فاهمة حاجة ،،بسبب اللي حصل ده حصلي تروما، و بقيت اخاف من اللمس ،يعني اي حد يلمسني احس بالتهديد، انا حاليا بروح لدكتورة نفسية ،بدأت اتحسن لكن لسه محتاجة وقت، لو حد قرب مني فجأة بصرخ غصب عني حتي لو كانت أمي.

بص خالد عليها و قال: كملي

كملت سدرة: أن شاء الله انت هتكون جوزي،و انا هحاول اتاقلم بس بلاش الغصب علشان محتاجة وقت اتعافي..

ضحك خالد و قال: انا اعجبت بيكي من اول لحظة و موافق و هتحمل معاكي.

أكدت سدرة على الكلام: فكر كويس الموضوع مش سهل..

خالد: فكرت و موافق و مستعد استنا العمر كله.

وقتها خالد قال إنه موافق بدون تفكير ،افتكر الموضوع سهل و حب ياخد لقطة البطل اللي يقبل ب مريضة نفسية،من غير ما يشوف نفسه هو قد المسؤولية او لا.

اتجوز خالد و سدرة و في البداية خالد كان يعرف يحتوي سدرة ،، كانت الحياة كويس بينهم و احيانا يتفهم حالة سدرة النفسية و احيانا لا.

لكن بعد الفترة الحال اتقلب..

خالد بعصبية: انا زهقت و جبت اخري

سدرة: زهقت من ايه، زهقت مني؟

خالد بصوت عالي: لا مش منك ،بس انتي تدلعي كتير و تستغلي مرضك

شاورت على نفسها بصدمة و قالت: انا بستغل مرضي و بدلع،و ده ليه

خالد : اسالي نفسك يا شيخة انتي حتي شغل البيت مقصرة فيه.

سدرة: انت كاذب علشان البيت ديما نضيف، و ترجع من شغلك تلاقي الأكل جاهز، أنا بعمل كل اللي اقدر عليه علشان اساعدك و في الاخر تقول كده.

خالد: ده اللي باخده منك،تتطلعي نفسك المظلومة و أنا الظالم