عازف بنيران قلبي

– يامامي كلِّ صحباتي بـيعملوا حفلات ويسهروا وحضرتك لسه بـتقولي أهو أنا كبرت، معرفش ليه أبيه راكان بـيخنقني بـتصرفاته دي؟!!! ثمَّ أكملت مفسرة:
عندك يُونس أهو ابن عمُّو بس غيره خالص، إخواته بـيروحو حفلات وبـيفضلوا للصبح وهو كمان بـيحبِّ يضحك ويسهر أمّا دا معرفش ماله؟!!

قاطعتها بـحزمٍ:
– أخوكي خايف عليكي، مش معنى كدا أنه بـيتحكِّم فيكي، وبعدين ماهو بـيعامل سليم الراجل كدا مش هـيعاملك إنتي يابنت!! وبعدين تعالي شوفي يارا بنت عمّتك أهي بـتعمله حساب..ياريت تاخدي بالك من أسلوبك في اللبس كمان وبلاها البناطيل المقطعة دي!! قال موضة،
دي موضة زفت على دماغكم!!…قالتها زينب وخرجت متأففةً من أسلوب ابنتها..
-اتَّجهت إلى غرفة ابنها..
طرقت الباب عدَّة طرقات، دخلت بعدما سمح لها بـالدخول..
صباح الخير ياحبيبي.
– صباح الورد ياستِّ الكل..قالها مقـ,ـبلًا جبينها..
جلست على فراشه..
-كان واقفاً أمام مرآته يُهندمُ ملابسه، نظر لها من خلال المرآة وتساءل:

– فيه حاجة ياماما؟
ابتسمت له وأردفت:
– سلامتك ياحبيبي..اتَّجه لها ناظرًا بـاستفهام:
– لا شكلك مضايقة من حاجة..
هزَّت رأسها بالنفي…ثمَّ زفرت وتنهدت:
– جدّك عامل اجتماع…وربنا يستر مايتخانقش مع راكان زي كل مرة.. -قطبَ جبينه متسائلا:
– إنتي خايفة على راكان ياماما من جدو؟!!!
أخذت شهيقًا وزفرته بـهدوء:
– راكان عصبي وجدَّك كمان، أنا كلِّ مرة بـحطِّ إيدي على قلبي، متنساش مرات عمَّك بـتحبِّ تصطاد في المية العكرة يابني..
-ضحك سليم بـصوته الرجولي:
– مين دي ياماما؟!..إيه يازوزو نسيتي إنتي مين وولادك مين ولَّا إيه؟!! خايفة من فراويلة بنت سلطح ملطح؟ دي منفوخة على الفاضي!!

-اغروقت عيناها فجأةً من ذكرياتٍ أليمةٍ مرَّت بها بـتلك العائلة، كم كانت تكره ضعفها الذي انتابها حين تذكَّرت مأساتها مع والد زوجها الطاغي.. هذا الضعف تحوَّل لـحزنٍ تسرَّب إلى قلبها فأدماه حتى شعرت بـعدم تنفسها..
-نظر سليم لـصمتها ثمَّ احتضن يديها بين راحتيه:
– ماما مالك ياحبيبتي، ليه شكلك اتغيَّر كدا؟!!!
هزَّت رأسها وربتت على يديه:
-مفيش ياحبيبي، بس افتكرت حاجة.. المهم ياسليم كلِّم راكان وخليه يهدى وبلاش كل شوية تصادم مع جدُّه يابني..
قبَّل رأسها وطالعها بـنظرةٍ حنونةٍ مؤكدًا:
– حاضر ياستِّ الكل أنا هعدِّي عليه قبل ماأنزل..
وقفت متجهةً للخارج:
– ربنا يكمِّلك بـعقلك ياحبيبي.